निकेश खनाल

बर्दिवास

बर्दिवास नगरपालिका अत्यधिक गर्मी आ गरम हवा (लू) क प्रभाव बढ़ैत गेला क,वाद नगरभितर सञ्चालित सभ विद्यालयमे दुई दिनक लेल विदा दैबाक निर्णय कएने अछि। नगरपालिका बुधदिन सूचना जारी करैत बिगत किछु दिनसँ निरन्तर बढ़ि रहल तापक्रमक कारण जनजीवन प्रभावित होएक साथे विद्यालयमे अध्ययनरत् बालबालिकाक स्वास्थ्यमे प्रतिकूल असर पड़ि सकैबाक जोखिम बढ़ल हुअइ सँ मिति २०८३ जेठ २१ गतेसँ २२ गते धरि सामुदायिक, संस्थागत (निजी) तथा धार्मिक विद्यालय सभक पठनपाठन पूर्ण रूपसँ बन्द रहबाक जानकारी करौने अछि।

नगरपालिकाक मिति २०८३ जेठ २० गतेक निर्णयअनुसार ओइ विदा देल गेल जनाओल गेल अछि। बर्दिवास नगरपालिकाक प्रमुख प्रशासकीय अधिकृत राममणि अधिकारीद्वारा जारी सूचनामे विद्यार्थी सभक स्वास्थ्य, सुरक्षा आ हितकेँ ध्यानमे राखैत ई निर्णय कएल गेल उल्लेख अछि।

नगरपालिका अभिभावक सभकेँ सेहो गर्मीक समयमे बालबालिकाकेँ अनावश्यक रूपसँ घरबाहर घुमफिर नइँ करए दए आवश्यक सतर्कता अपनाबऽ लेल आग्रह कएने अछि। बढ़ैत गर्मी आ लूक कारण तराई–मधेसक जिला सभमे जनजीवन प्रभावित बनैत जा रहल अछि तँ स्वास्थ्यकर्मी सभ सेहो पर्याप्त पानि पीबाक, धुपमे बेसी समय धरि नइँ बैसबाक तथा विशेष सावधानी अपनाबऽ लेल सुझाव देने छथि।