आज्ञा खबर
सर्लाही

बागमती नगरपालिकाक निलम्बित प्रमुख भरतकुमार थापा केँ गैरकानूनी सम्पत्ति आर्जन आ ठेक्कासम्बन्धी भ्रष्‍टाचार मामिलामे विशेष अदालत दोषी ठहरा देलक अछि। विशेष अदालत बुधदिन हुनका जेल आ भारी जरिमाना देबाक फैसला सुनौलक अछि।

विशेष अदालतक संयुक्त इजलास — न्यायाधीश टेकनारायण कुँवर, मुरारीबाबु श्रेष्ठ आ विदुर कोइरालाक इजलास — एतबा प्रमाणित केलक जे थापाक कुल कानूनी आम्दनी ९ करोड़ १४ लाख ३१ हजार रूपैया रहैत, ओ १२ करोड़ ५९ लाख ५३ हजार रूपैयाक खर्च केलनि। ओना देखल जाय तँ ३ करोड़ ४५ लाख २२ हजार ३८७ रूपैया बेसी सम्पत्ति रहनि, जकर स्रोत ओ प्रमाणित नै कऽ सकलाह।

एही आधार पर अदालत थापाक एक वर्षक कैद सजाय आ गैरकानूनी सम्पत्तिक रकमक बराबर जरिमाना ठहर केलक।

एतबे नै, अदालत बागमती नगरपालिकाक नदीजन्य पदार्थक ठेक्का-पट्टामे ३० करोड़ २९ लाख रूपैयासँ बेसी क्षति पुर्येबाक आरोपमे सेहो थापाकेँ दोषी मानलक अछि। एही मामिलामे सजा तोरबाक लेल अदालत अगिला पेशी तय केलक अछि।

‘भरत ताल’ निर्माण जकाँ सृजनात्मक काजसँ किछु काल धरि चर्चा बटोरने थापा माओवादी केन्द्रक तर्फसँ निर्वाचित जनप्रतिनिधि छथि। हुनक कार्यकालमे योजना शाखाक प्रमुख इन्जीनियर सागर पौडेल आ प्रमुख प्रशासकीय अधिकृत विमलकुमार पोखरेल सेहो भ्रष्‍टाचार मामिलामे संलग्न रहला। विशेष अदालत ओहूमे दुनूकेँ दोषी ठहर केलक अछि।

ओहीसँ विपरीत, उपमेयर लीलाकुमारी मोक्तान, तत्कालीन लेखा अधिकृत विश्वराज पोखरेल आ जिलासमन्‍वय समितिक पूर्व प्रमुख मेथुर चौधरी केँ अदालत निर्दोष मानलक अछि।