सुभद्रा भुजेल
महोत्तरी
महोत्तरीको मनराशिस्वा नगरपालिका निवासी एकल महिला इन्दुकुमारी देवीले सहकारी संस्थामा फसेको रकममध्ये आठ लाख रुपैयाँ फिर्ता पाएकी छन् । जिल्ला प्रशासन कार्यालय महोत्तरीको पहलमा लामो समयदेखि रोकिएको रकम फिर्ता भएपछि उनलाई आर्थिक राहत मिलेको छ ।
वैदेशिक रोजगारीमा रहेका श्रीमानको तीन वर्षअघि दुर्घटनामा मृत्यु भएपछि प्राप्त १२ लाख रुपैयाँ क्षतिपूर्ति उनले २०८० असार २४ गते औरहीस्थित सोनामाई बचत तथा ऋण सहकारी संस्थामा जम्मा गरेकी थिइन् । सहकारीले वार्षिक २४ प्रतिशत ब्याज दिने आश्वासन दिएपछि उनले उक्त रकम त्यहाँ राखेकी थिइन् ।
सुरुका केही महिना ब्याज पाए पनि पछि सहकारी संस्था बन्द भएपछि उनी सावाँ रकमसमेत फिर्ता पाउन नसक्ने अवस्थामा पुगेकी थिइन् । तीन जना नाबालिका छोरीको पालनपोषण र भविष्यको जिम्मेवारी सम्हालिरहेकी इन्दुकुमारीका लागि श्रीमान्को मृत्युपछि प्राप्त क्षतिपूर्तिको रकम नै मुख्य आर्थिक आधार थियो ।
सहकारीमा रकम फसेपछि अन्योलमा परेकी उनले न्यायका लागि जिल्ला प्रशासन कार्यालय महोत्तरीमा निवेदन दिएकी थिइन् । पीडितको निवेदनपछि प्रशासनले सहकारी सञ्चालक पक्षसँग पटक–पटक छलफल र संवाद गर्दै रकम फिर्ता गराउन पहल गरेको थियो ।
महोत्तरीका प्रमुख जिल्ला अधिकारी इन्द्रदेव यादवका अनुसार प्रशासनको पहलपछि सहकारी सञ्चालक पक्षले पहिलो चरणमा आठ लाख रुपैयाँ फिर्ता गरेको छ । बाँकी चार लाख रुपैयाँ र ब्याजसमेत मंसिर ४ गतेसम्म फिर्ता गर्ने सहमति भएको उनले जानकारी दिए ।
आर्थिक रूपमा कमजोर अवस्थामा रहेकी इन्दुकुमारीले लामो समयपछि रकमको केही हिस्सा फिर्ता पाएपछि राहत महसुस गरेकी छन् । उनले रकम फिर्ता गराउन सहयोग गरेको भन्दै जिल्ला प्रशासन कार्यालयप्रति आभार व्यक्त गरेकी छन् ।
प्रमुख जिल्ला अधिकारी यादवले पीडितलाई न्याय दिलाउन र समस्याको समाधान गर्न प्रशासनले आफ्नो जिम्मेवारीअनुसार पहल गरेको बताए । सहकारीमा रकम फसेका नागरिकको समस्या समाधानका लागि सम्बन्धित पक्षसँग समन्वय र संवाद आवश्यक रहेको उनको भनाइ छ ।
सहकारीमा बचत गरेको रकम फिर्ता नपाउँदा समस्यामा परेका नागरिकका लागि इन्दुकुमारीको घटनाले बचतको सुरक्षा, सहकारीको जवाफदेहिता र पीडितको गुनासो सम्बोधनमा सम्बन्धित निकायको सक्रियता कति महत्त्वपूर्ण हुन्छ भन्ने देखाएको छ ।
