आज्ञा खबर
बर्दिवास
नेपाली स्वास्थ्य प्रणालीक मौलिक आधारशिला मानल जाइत महिला स्वास्थ्य स्वयंसेविका सभक सम्मान करबाक परंपरा धीरे-धीरे संस्थागत बनैत जा रहल अछि। एही परिप्रेक्ष्य मे बर्दिवास नगरपालिकाक एकटा अनुपम उदाहरण देखल गेल अछि, जतय २०४५ साल सँ लगातार सेवा दैत अबैत महिला स्वास्थ्य स्वयंसेविका सभकेँ शुक्रदिन एकटा विशेष कार्यक्रम मे दीर्घ सेवा सम्मान देल गेल।
एहि कार्यक्रमक विशेषता ई रहल जे नेपाल सरकार द्वारा सेवा निवृत्तिपर महिला स्वास्थ्य स्वयंसेविका सभकेँ देल जाइत २० हजार टाका सम्मान राशिक संग बर्दिवास नगरपालिकाक ओर सँ अतिरिक्त ८० हजार टाका जोडिकय कुल १ लाख टाका नगद सीधे हुनकर बैंक खाता मे पठाओल गेल। ई ऐतिहासिक निर्णय नगर प्रमुख प्रह्लाद कुमार क्षेत्रीक पहल, दृढ इच्छाशक्ति आ जनसेवा प्रति समर्पणक परिणाम रहल।
नगरपालिका स्वास्थ्य शाखाक आयोजनामे भेल एहि कार्यक्रम मे नगर प्रमुख क्षेत्री कहलनि, “स्वयंसेविका सभक त्याग, समर्पण आ नि:स्वार्थ सेवाक कारणे बर्दिवासक सार्वजनिक स्वास्थ्य आज एतेक मजबूत बनल अछि। ओ सभ समाजक गुमनाम नायक छथि। हुनकर योगदान केँ मान्यता देनाय आ सम्मान करनाय हमर कर्तव्य छी। आगामी वर्ष सँ नव नियुक्त स्वयंसेविका सभक तालिम, मासिक भत्ता आ बीमा जेकाँ कार्यक्रम सेहो आगू बढ़ाउब।”
२०४५ सालक आसपास नेपाल सामुदायिक स्वास्थ्य सुधारक नाम पर महिला स्वास्थ्य स्वयंसेविका कार्यक्रम शुरू कएलक। तहिया बहुत लोक ई सेवा केँ केवल सामाजिक दायित्व बुझिकय केलक। बर्दिवासक अधिकांश स्वयंसेविका अपन घरक जिम्मेवारी संग-संग आन महिलाकेँ प्रसव कराबय, टीका लगाबय, गर्भवती महिलाक देखभाल करय, स्वास्थ्य शिक्षा देबाक आ पोषण कार्यक्रम चलाबय मे अगुआ बनली। ओ सभ कखनो नियमित पारिश्रमिक नै माँगली। सरकार हुनका बीच-बीच मे प्रमाणपत्र आ तालीसँ सम्मान त देलक, मुदा यथोचित आर्थिक मान्यता नै भेटल।
नेपाल सरकार द्वारा देल जाइत २० हजार टाका सम्मान राशिकेँ अपर्याप्त बुझिकय नगर प्रमुख क्षेत्री ओहि राशिकेँ पाँच गुणा बढ़ा कऽ १ लाख टाका करबाक ऐतिहासिक निर्णय लेलनि। ई कदम केवल बर्दिवास नगरपालिकेँ नै, समस्त देशक स्थानीय तह लेल प्रेरणाक स्रोत बनि गेल।
कार्यक्रममे भाग लेलनि बर्दिवास-३ केर स्वास्थ्य स्वयंसेविका उर्मिला कार्की कहलनि, “गेल २३ असार हमरा मोबाइलमे बैंक सँ मैसेज आयल जे खाता मे १ लाख टाका आयल। मन बहुत खुश भेल, से दुखो भेल। खुश तें भेलहुँ जे नगरपालिका हमर योगदान केँ उचित मूल्य देलक। दुख एहि बातक जे आब हम एही सामाजिक सेवासँ हमेशा लेल अलग भऽ गेलहुँ।”
३० वर्ष सँ बेसी नि:स्वार्थ सेवा देनिहार स्वयंसेविका सभकेँ नगद सम्मान केवल आर्थिक सहयोग नै, बल्कि ई समाज द्वारा हुनक सेवाक मान्यता छी — कहलनि बर्दिवास-१४ केर जानकी शाही। ओ सहित कार्यक्रम मे सहभागिता लेल सभ स्वयंसेविका सभ बर्दिवास नगरपालिका आ नगर प्रमुखक प्रशंसा केलनि।
कार्यक्रम दौरान जतबे स्वयंसेविकाक नाम घोषण भेल, तेमे तेमे हुनका १ लाख टाका केर चेक देल गेल। बहुत स्वयंसेविका सभ भाबुक भऽ गेलीह। ओहि भावनामे पीड़ा आ संघर्षक संग-संग समाज आ राज्य द्वारा स्मरण कएल गेलाक आत्मीयता छल।
बर्दिवास नगरपालिकाक एहि प्रयाससँ अन्य स्थानीय तह सभो महिला स्वास्थ्य स्वयंसेविका सभक सेवा केँ मान्यता देबाक दिशामे आगाँ बढ़थ — एहन आशा कएल जा रहल अछि।
सामुदायिक स्वास्थ्य सेवा — जकर जड़ि समाजक अन्तिम घरधुरी तक पहुँचल अछि — ओहि प्रणाली मे संलग्न महिला स्वास्थ्य स्वयंसेविका सभ लेल बर्दिवास नगरपालिकाक ई सम्मान भावी पीढ़ीक लेल प्रेरणास्वरूप बनि रहल अछि। ई केवल सम्मानक कार्यक्रम नै छल — ई हुनकर जीवन, त्याग आ कर्म प्रति समाजक स्वीकृति आ मूल्यांकन छल।
