आज्ञा खबर
महोत्तरी
महोत्तरी जिलाक गौशाला मालपोत कार्यालयमे एक मृतक व्यक्ति केर नाम पर नकली कागजात तैयार कए जमीन बेचबाक मामला सामने एल अछि। मालपोत कार्यालयक कर्मचारी आ भूमाफिया सभक मिलीभगतसँ सरकार केँ राजस्वमे हानि पहुँचबैत अवैध तरिकासँ ई कारोबार कएल गेल अछि।
गौशाला नगरपालिका–४ केर वडाध्यक्ष रामनारायण महासेठ 2081 सालक असार ६ गते मृत्यु भऽ चुकल महेश चौधरी नामक व्यक्ति केर नाम पर रहल शिवभक्ति खोर–२ (ख) स्थित कित्ता नम्बर १८३ केर ५ आना १२.५ धुर जमीन बेचबाक सिफारिश केने छलाह। कृषि प्रयोजनक लेल वर्गीकृत ई जमीन सार्वजनिक बाटो बिनु रहितो नकली कागजक आधार पर असार ८ गते सम्सी गाउँपालिका–४ केर रञ्जित कुमार साहक नाममे ११ लाख ३५ हजार रुपैयामे नामसारी कएल गेल।
नियमक उल्लंघन: नगदमे कारोबार
कानून अनुसार जमीन खरीद-बिक्रीमे रकम बैंकमार्फत भुक्तानी कएर भौचर मालपोतमे बुझेनाइ अनिवार्य अछि। मुदा, ई कारोबार नगदमे सम्पन्न भेल अछि। संगहि, विक्रेताक नागरिकता प्रमाणित नहि कएल गेल, बैंक खातामे पैसा जमा नहि भेल, झूठ विवरण प्रस्तुत कएल गेल, आ लेखापढी व्यवसायी तथा मालपोतक कर्मचारी सभक संलग्नता देखायल गेल अछि।
मृतकक नाममे फेर सोंपल गेल जमीन
गौशाला मालपोतक सूचना अधिकारी विष्णु कुमार महत अनुसार, असार ६, ८ आ ९ गते तीन बेर जमीन बेचबाक प्रयास भेल। पछाइत असार १६ गते मालपोत कार्यालय समस्त कारोबार रद्द कए देलक। खरीदारक सहयोगसँ जमीन फेर सँ मृतक महेश चौधरीक नाममे सोंपल गेल। विक्रेताक पहिचान एखन धरि स्पष्ट नहि भेल अछि आ ओ फरार बताओल गेल अछि।
जलेश्वर मालपोतसँ सेहो भेल प्रयास
महतक अनुसार, महेश चौधरीक नाममे रहल अन्य जमीन जलेश्वर मालपोत कार्यालयक माध्यमसँ सेहो बेचबाक प्रयास कएल गेल छल। मुदा, खरीदार आ विक्रेताक बीच आर्थिक सहमति नहि बनलाक कारण ओ नामसारी प्रक्रिया फेरे लऽ लेल गेल।
ई समग्र प्रकरण मालपोत व्यवस्थाक गंभीर कमजोरी, निगरानीक अभाव आ भ्रष्टाचारक गहिर सञ्जालकेँ उजागर करैत अछि। मृतकक नाम पर नकली कागजात बना जमीन खरीद-बिक्री करब अपनेमे गंभीर अपराध छी। एहि मामिलाक विस्तृत छानबिन कए दोषी सभ पर कड़ाईसँ कार्रवाई करबाक मांग स्थानीय स्तर पर उठैत शुरु भऽ चुकल अछि।
