आज्ञा खबर,
जनकपुरधाम
मधेश प्रदेश सरकार द्वारा पेश कएल गेल बजटमे देखल गेल त्रुटिक जाँच करबाक लेल नव कार्यदल केर गठन कएल गेल अछि। शनिदिन प्रदेशसभाक छैठम बैठक लगातार विपक्षी दल सभक अवरोधक कारण आगाँ नहि बढ़ि सकलाक बाद सभामुख केर नेतृत्वमे बनल पुरान कार्यदलकेँ विघटन कए उपसभामुख केर संयोजकत्वमे नव कार्यदल बनाओल गेल अछि।
नव गठित कार्यदल १४ सदस्यीय होएत, जाहिमे विपक्षी दल सभसं ७ आ सत्तारूढ़ पक्ष सं ६ गोटे प्रदेशसभा सदस्य समाविष्ट कएल गेल छथि। उपसभामुख बबिता राउत ईशर कार्यदल केर संयोजक होथिन।
पूर्व कार्यदलमे सत्तापक्ष केर सरोजकुमार यादवकेँ राखल गेल रहबाक विरोध करैत रहल विपक्षी दल सभ नव कार्यदलमे सहभागी भेल छथि। कार्यदल बजटमे भेल त्रुटिकेँ जाँच कए प्रतिवेदन देत, तखनहि बजटमाथि बहस आगाँ बढ़त—ई जानकारी एकीकृत समाजवादी पार्टीक प्रमुख सचेतक कनिष पटेल देने छथि।
प्रदेशसभा सचिवालय केर अनुसार आब सोमबारे मात्र प्रदेशसभा बैठक बसत। कार्यदल ओहि सं पूर्वे अपन काज शुरू करबाक तैयारीमे अछि।
नव कार्यदलमे निम्न सदस्य सभ छथि:
-
मो. समीर
-
शारदा देवी ठाकुर
-
चन्दन कुमार सिंह
-
शम्भु कुमार साह
-
जंगीलाल राय
-
नागेन्द्र साह
-
रमिता प्रधान
-
रामअशिष यादव
-
कनिष पटेल
-
जवाहरलाल कुशवाहा
-
विमला अन्सारी तरन्नम
-
कञ्चन विच्छा
-
उर्मिला देवी सिंह
नव कार्यदलसँ निष्पक्ष आ तथ्यपर आधारित प्रतिवेदन अएबाक अपेक्षा कएल गेल अछि, जाहिसँ प्रदेशक आर्थिक गतिशीलता सहज बनत—ऐ आशा व्यक्त कएल गेल अछि।
