अज्ञा खबर
बर्दिवास, महोत्तरी।

बर्दिवास मे करप्रति जनचेतना बढ़ेबा आ युवा सभकेँ खेल दिस आकर्षित करबाक उद्देश्य सं आन्तरिक ब्याडमिन्टन प्रतियोगिता सम्पन्न भेल अछि। ई प्रतियोगिता करदाता सेवा कार्यालय बर्दिवासक समन्वय आ बर्दिवास ब्याडमिन्टन संघक आयोजनामे सम्पन्न भेल, जाहिमे बर्दिवास नगरपालिकाक क्षेत्रभित्तरक १६ टा समूह सभ भाग लेने छल।

ब्याडमिन्टन संघ बर्दिवासक अध्यक्ष पोषण थापा अनुसार, प्रतियोगितामे दीपक शर्मा आ संजय मण्डलक जोड़ी पहिल स्थान प्राप्त कएलक। ओही तरहेँ हेमलामा आ मोहनराज गिरीक जोड़ी दोसर स्थान पर रहल, जखनकि ‘ए पोल’ सं बिरेन्द्र कार्की आ डिल्लीराज राउत तथा ‘बी पोल’ सं गया प्रसाद गुप्ता आ देवेन्द्र थिङक जोड़ी संयुक्त रूप सं तेसर स्थान प्राप्त कएलक।

समापन समारोहमे बर्दिवास नगरपालिकाक नगर प्रमुख प्रह्लाद कुमार क्षेत्री अपन सम्बोधनमे कहलनि जे खेलकूद राष्ट्र निर्माण आ स्वास्थ्य दुनू लेल जरूरी अछि। ओ कहलनि, “अहिबेर बेरोजगारीक कारण सं युवा वर्ग लागूपदार्थक शिकार भ’ रहल अछि। एहि अवस्थासँ बचबाक लेल खेलकूद एक सकारात्मक माध्यम बनि सकैत अछि।”

नगर प्रमुख क्षेत्री विश्वास प्रकट केलनि जे करप्रति जागरुकतामे एहन खेलकूद कार्यक्रम सहायक होइत अछि। आयोजकक अनुसार, कार्यक्रम करदातासभमे करक प्रति उत्तरदायित्व आ नियमितताक संदेश सेहो देलक।