अज्ञा खबर
बर्दिवास, महोत्तरी।
बर्दिवास नगरपालिका–३, रजाबास मे संचालित ‘महिलासँ उपप्रमुख सिप विकास कार्यक्रम’ केर अंतर्गत, सालक पात सँ दुनाटपरी बनेबाक तालिम महिलासभ केँ लक्षित कए कएल गेल। बर्दिवास नगरपालिकाक आयोजनामे सम्पन्न भेल एहि तालिमक उद्देश्य महिलासभ केँ आर्थिक सशक्तिकरण आ आत्मनिर्भरता दिसा आगाँ बढ़ेबा रहल अछि।
तालिमक समापन समारोहमे नगर प्रमुख प्रह्लाद कुमार क्षेत्री कहलनि जे नगर क्षेत्रक महिलासभ केँ सिप विकास मार्फत आर्थिक सुधारक दिशामे ल’ जाएबाक उद्देश्य सँ एहेन तालिम संचालन कएल जाइत अछि। ओ कहलनि, “दुनाटपरीक मांग आब केवल बर्दिवास नगर मे नहि, बल्कि बाहरी जिलासभ मे सेहो बहुत बेसी अछि। हम सभ बाजार व्यवस्थापन क’ निर्यात दिसा सेहो आगाँ बढ़ब।”
ओ कहलनि जे बर्दिवास नगरपालिकाक योजना अनुसार महिलासभ केँ आत्मनिर्भर बनेबाक लेल सिलाई-कटाई, ब्यूटीपार्लर, लोड़ी बनेबइ, पशुपालन आ आन उत्पादनमुखी तालिमसभ निरंतर देल जा रहल अछि।
कार्यक्रम मे प्रमुख प्रशासकीय अधिकृत राममणि अधिकारी कहलनि जे महिलासभ केँ केवल चूल्हा-चौका तक सीमित नहि राखिक’ अपन सिप सँ आय आर्जन करबाक प्रेरणा देबाक समय आबि गेल अछि। ओ कहलनि, “घर खर्च लेल अब परिवारक लोकसँ मांग करबाक अवस्था समाप्त हेबाक चाही। महिलासभ केँ अपनाकेँ सक्षम बना क’ परिवार आ समाज मे आर्थिक रूपसँ सबल बनेबाक आवश्यकता अछि।”
एहि तालिम मे रजाबासक २५ गोट महिला सहभागी छलथि। प्रशिक्षकसभ सालक पात संग्रह सँ ल’ क’ ओहि पात केँ सुखेबा, डिजाइन करबा, सिलाइ करबा आ बाजार मे बिक्री करबाक सम्पूर्ण प्रक्रिया सिखेलनि। सहभागी महिलासभ कहलनि जे तालिम अत्यंत उपयोगी रहल आ एही सँ हुनका सभ केँ आमदनीक नव बाट देखाइ देलक।
स्थानीय महिला सहभागी मनकला चौधरी कहलखिन, “हम जेकाँ गृहिणीसभ केँ नगरपालिकासँ सिखबाक अवसर भेटल से खुशीक बात अछि। आब हम एहि सिप केँ घर पर बैसिक’ उपयोग करब आ आमदनी करब।”
बर्दिवास नगरपालिकाक जनतब अनुसार, भविष्य मे आन बस्तीसभ मे सेहो एहेन तालिमसभ विस्तार करबाक योजना अछि। सिप विकास कार्यक्रम मार्फत महिलासभ केँ आत्मनिर्भर बनेबाक एहि अभियान सँ स्थानीय स्तर पर रोजगार सृजन आ महिला सशक्तिकरण पर सकारात्मक प्रभाव पड़त, से आशा कएल जा रहल अछि।
