आज्ञा खबर
सर्लाही
सरकार जखन एहि बरख उखु किसान सभक अनुदान रकम कटौती कऽ देलक तऽ ओइ सँ किसान सभमे पैघ आक्रोश फैलि गेल अछि। आइ सँ देशक विभिन्न जिलामे किसान लोकनि अपन-अपन स्थानीय चिनी उद्योगक आगाँ टायर स ज्वलन करैत विरोध प्रदर्शन शुरू कऽ देलथि अछि। सब सँ बेसी उखु खेती होमयवला सर्लाही जिलामे तीनू प्रमुख चिनी मिलक आगाँ उखु किसान सभ प्रदर्शन कऽ रहल छथि।
इन्दुशंकर चिनी उद्योग हरिवन, अन्नपूर्ण चिनी उद्योग धनकौल आ महालक्ष्मी चिनी उद्योग बगदहक आगाँ किसान सभ सरकारक निर्णयक विरोधमे अपन असंतोष प्रकट कए रहल छथि। किसान सभ २०६६ सालमे कड़ संघर्षक बाद शुरू भेल उखुक अनुदान रकम निरंतर जारी रखबाक सरकार सँ मांग कए रहल छथि। ओइ संगहि, गेल वर्ष बिक्री भेल उखुक लेल सरकार जे प्रति क्विन्टल ७० टाका अनुदान देल गेल छल तकर भुगतान तुरन्त करबाक आ उखुक मूल्य निर्धारणक लेल वार्ता शुरू करबाक आग्रह सेहो कए रहल छथि।
सरकार जखन अनुदान रकम आधा घटा कऽ प्रति क्विन्टल केवल ३५ टाका देबाक चर्चा शुरू केलक तऽ उखु किसान लोकनि असंतुष्ट भऽ गेल छथि। केन्द्रीय उखु संघर्ष समितिक सह-समन्वयक राजकुमार उप्रेतीक अनुसार, यदि साउन महिनाक भीतर किसानक मांग पूरा नहि भेल तऽ आगामी भाद्र ८ तारिख सँ उखु किसान लोकनि माइतीघरमे धरना देबाक निर्णय कएने छथि।
उखु किसान सभ प्रधानमंत्री, कृषि मन्त्री सहित संबंधित पदाधिकारी सभ केँ ज्ञापनपत्र बुझा चुकल छथि आ शांतिपूर्ण ढंग सँ अपन मांग राखि चुकल छथि, से सह-समन्वयक उप्रेती जनौलनि। ओ कहला, “अनुदान कटौती सँ किसान सभ उखु खेती सँ दूर भऽ जायत आ चिनी उद्योग सभ बंद होयबाक स्थिति बनत। एहि सँ देशमे चिनी अभावक संकट उत्पन्न भऽ सकैत अछि।”
देशक विभिन्न भागमे उखु किसान सभ अपन-अपन क्षेत्रमे आन्दोलन तेज कए रहल छथि आ सरकार सँ चेतावनी देल गेल अछि जे किसानक मांग केँ गंभीरतापूर्वक लऽ कऽ समाधान करबाक आवश्यकता अछि
