आज्ञा खबर
सिरहा
लहान नगरपालिका–१३ पक्कीटोलमे स्थानीय लोकनिक सक्रियता सऽ बनावल गेल अस्थायी पुलिस चौकीक भवन बुधदिन औपचारिक रूप सऽ पुलिस प्रशासनके हस्तान्तरण कएल गेल।
मधेश प्रदेश पुलिस प्रमुख डिआईजी उमाप्रसाद चर्तुवेदीके भवनक चाबी निर्माण समितिक अध्यक्ष अश्विन कुमार राउत सौंपलथि। स्थानीय लोकनि चन्दा संकलन कऽ कऽ जमीन किनलथि आ ओही ठाम ई भवन निर्माण कएल गेल।
“समूहिक प्रयास सऽ पुलिस भवन बनेने आ ओहि केँ सरकारके देब सकलहुँ, ई बात पर हम सभ गौरव अनुभव करैत छी,” अध्यक्ष राउत कहलथि। लहान नगरपालिकाक मेयर महेश चौधरी जनौलनि जे नगरपालिका सेहो भवन निर्माणमे दुइ लाख टाका आर्थिक सहयोग देने छल।
मेयर चौधरी कहलनि जे स्थानीय लोकनिक ई पहल शांति-सुरक्षाप्रति जनप्रतिबद्धताक उत्कृष्ट उदाहरण छी।
हस्तान्तरण समारोहमे डिआईजी चर्तुवेदी अपन पूर्व कार्यकाल—जखन ओ लहानमे पुलिस नायब उपरीक्षक आ जिला पुलिस प्रमुख छलाह—क स्मरण करैत कहलनि जे समाजमे शांति आ सुरक्षा स्थापनाक लेल सामुदायिक सहकार्य अनिवार्य अछि।
समारोहमे चन्दा दऽ योगदान करनिहार सभके सम्मान सेहो कएल गेल।
