आज्ञा खबर
बर्दिवास
प्रत्येक दिन चरम सूखाक चपेटामे रहल मधेस प्रदेशक लोकनिकेँ पछिला वर्षा सँ किछु राहत भेटल अछि। जल आ मौसम विज्ञान विभाग अन्तर्गतक मौसम पूर्वानुमान महाशाखाक अनुसार पछिला २४ घंटामे प्रदेशक विभिन्न ठाम सभमे सन्तोषजनक वर्षा भेल अछि।
विशेष कऽ क’ धनुषाक मिथिला नगरपालिका-११ स्थित तुलसी क्षेत्रमे ६३.८ मिलिमिटर वर्षा मापन कैल गेल अछि, जे समग्र प्रदेशमे सभसँ बेसी अछि। तहिना बाराक अमलेखगंजमे ४६.४ मिलिमिटर, रौतहटक गौरमे ४४.६ मिलिमिटर आ हर्दिनाथमे ५१ मिलिमिटर वर्षा भेल अछि, महाशाखा जनौलनि।
मौसम विशेषज्ञक अनुसार ५० मिलिमिटर सँ बेसी वर्षाकेँ “भारी वर्षा”क श्रेणीमे राखल जाइत अछि। तुलसी आ हर्दिनाथमे भेल वर्षा ओहि श्रेणीमे अबैत अछि, जखनकि दोसर ठाम सभमे मध्यम दरसँ पानी भेल अछि।
सर्लाही जिलामे ३७.६ मिलिमिटर आ महोत्तरीक गौशाला मापन केन्द्रमे ३२.४ मिलिमिटर वर्षा भेल अछि। सिरहा आ सप्तरीमे अबधि धरि उल्लेखनीय वर्षा नहि भेल अछि। मुदा, एतेक दिनक सूखाक बाद भेल एहि वर्षासँ जमीन भिजय लागल अछि, एहि बातक संकेत भेटैत अछि।
स्थानीय किसान सभ एहि वर्षासँ बहुत आशावान देखाइत छथि। लगातारक सूखाक कारण मक्का, धान आ तरकारीक उत्पादन प्रभावित भेल छल, मुदा आबक वर्षासँ खेत-बारीमे हरियाली फर्कैकेँ उम्मीद कएल जा रहल अछि।
एहि सँ पहिने असारक मसान्त धरि नीक वर्षा नहि भेलाक कारणेँ किसान सभ धानक रोपनीमे बहुत कठिनाइमे पड़ल छलाह। आब यदि झरी नियमित रहल त’ फसलक उत्पादन सन्तोषजनक होयबाक अनुमान कएल जा रहल अछि।
