ढल्केवर, चैत २४ गते ।
धनुषाको मिथिला नगरपालिकामा जारी वडास्तरीय फुटबल प्रतियोगीता अन्तर्गतको खेलमा नक्टाझिजलाई ४-१ ले हराउँदै ढल्केवर विजयी भएको छ ।
बुधवार भएको खेलमा मिथिला नगरपालिका-२ नक्टाझिजस्थित रहेको हिमालय युवा क्लवलाई ४-१ गोल अन्तरले पराजित गर्दै मिथिला नगरपालिका-६ ढल्केवरस्थित रहेको प्रतिभा युवा क्लव प्रतियोगीताको सेमिफाइनलमा प्रवेश गरेको हो ।
ढल्केवरका लागि राहुल परियारले नक्टाझिजविरुद्ध ३ गोल गरेका थिए । दुवै टिमबीच भएको निकै प्रतिस्पर्धात्मक र रोमाञ्चक खेलको म्यान अफ दि म्याचको उपाधि नक्टाझिजका अजय रायलाई प्रदान गरिएको हो ।
ढल्केवरस्थित रहेको प्रतिभा युवा क्लबको आयोजना तथा मिथिला नगरपालिकाको आर्थिक सहयोगमा ढल्केवरमा पहिलो पटक वडास्तरीय फुटबल प्रतियोगीता भइरहेको छ ।
चैत २० गतेबाट सुरु भएको प्रतियोगीता २७ गतेसम्म चल्ने आयोजक क्लबका सदस्य देवराज घिमिरेले जानकारी दिए । उनका अनुसार उक्त फुटबल प्रतियोगीता मिथिला नगरपालिका–७ को वडाकार्यालय पछाडी रहेको फुटबल ग्राउण्डमा भइरहेको छ ।
