आज्ञा सम्वाददाता
बर्दिवास
महोत्तरीको बर्दिवासमा भईरहेको प्रथम बर्दिबास मेयर गोल्डकप फुटबलका आज भएको फाईनल खेलमा नबप्रतिभा क्लब सिरहा गोल बजार विजय भएको छ । बुधबार बर्दिवास रंगशालामा भएको फाईनल खेलमा प्रतिभाले सहलेश सिराहालाई पेनाल्टी शुटआउटमा ५–४ गोलले हराएको हो ।
खेलको अनतिम समयभित्र दुवै टिमले १–१ गोलको बराबरीमा खेल खेलेपछि खेलको अन्तिम निर्णय नै पेनाल्टी शुटआउट भएको थियो । खेलको १८ औं मिनेटमा सहलेश सिरहाका रूपक लामाले गोल गर्दै आफ्नो टिमलाई दिलाएको अग्रतालाई दोस्रो हाफको अन्तिम समयमा प्रतिभा क्लबका विशाल बस्नेतले गोल फर्काएर निर्धारित समयको खेल बराबरीमा टुंग्याएका थिए ।
त्यसपछी पेनाल्टी शुटआउटमा प्रतिभाका अमर श्रेष्ठ, निश्चल लामा, आविष्कार खड्का, शिशिर लेखी र म्याक्सवेलले गोल गरे । सहलेशबाट रितिक खड्का, गौरव श्रेष्ठ, अली ओलास र जनक कार्कीले गोल गरे पनी आर्मनको प्रहार भने विफल भयो ।
आज भएको फईनल खेलमा विजेता नवप्रतिभाले २ लाख र उपविजेता सहलेशले १ लाख रुपैयाँ पुरस्कार पाए । प्रतिभाका विशाल बस्नेत म्यान अफ द म्याच घोशित भए ।
त्यसैगरी उत्कृष्ट गोलरक्षक नवप्रतिभाकै मनोज प्रधान घोषित भए । उत्कृष्ट डिफेन्डर सहलेशका जनक कार्की, सर्वाधिक गोलकर्ता सहलेशका आर्मन, उत्कृष्ट मिडफिल्डर शिशिर लेखी, उदीयमान खेलाडी बर्दिवास ११ का अंकित मगर भए । सर्वोत्कृष्ट खेलाडी सहलेशका रूपक लामा भए ।
बर्दिवास नगरपालिकाको २० लाख ३७ हजार ५ सय ५० रुपैयाको बजेटबाट यो प्रतियोगिता सम्पन्न भएको नगर खेलकुद विकास समितिले जनाएको छ ।
