अभज्ञा सम्वाददाता
सिरहा
सिरहाको कमला नदी किनारमा फागुन १७ गत्ते शव फेला परेको काठमाडौंकी पूजा सिंह पोदारका हत्यामा सघाएको आरोपमा प्रहरीले सिरहाकै कल्याणपुर नगरपालिका– ४ जमुवाका २६ वर्षका मन्तोषकुमार साहलाई पक्राउ गरेको छ । उनलाई ५ दिन हिरासतमा राखेर अनुसन्धान गर्न जिल्ला अदालत सिरहाबाट अनुमति लिइसकेको जिल्ला प्रहरी कार्यालय सिरहाका प्रवक्ता एवं डीएसपी सुवास बुढाथोकीले जानकारी दिए ।
पूजाको श्रीमान् सिरहाको कर्जन्हा नगरपालिका–७ निवासी अमर राउत यसअघि नै पक्राउ परेका थिए । काठमाडौं महानगरपालिका–२० जैसीदेवल बस्ने २२ वर्षकी पूजासँग अमरले गत माघमा प्रेम विवाह गरेर काठमाडौंमा बस्दै आएका थिए । परिवारले पूजालाई नस्वीकारेपछि सम्झाउन भन्दै सिरहा पुगेका अमर नफर्किएपछि पूजा पनि १७ फागुनमा सिरहा गएकी थिइन् ।
यसबीचमा अमरको अर्कै ठाउँमा विवाह तय भइसकेको थियो । अर्को विवाहमा पूजा समस्या बन्न सक्ने भन्दै अमरले मन्तोषको सहयोग लिएर पूजाको हत्या गरेको प्रहरीको भनाइ छ । घट्नाको बिषयमा थप अनुसन्धान भईरहेको प्रहरीले बताएको छ ।
