सृष्टि क्षेत्री
बर्दिवास
महोत्तरीको बर्दिवास नगरपालिका ५ स्थित जंघा पुलमा शनिवार कन्टेनर र ट्रक एक आपसमा ठोक्किँदा एकजनाको ज्यान गएको छ । अन्य तीनजना गम्भीर घाइते भएका छन् । पूर्वपश्चिम महेन्द्र राजमार्गअन्तर्गत बर्दिबासबाट पश्चिम तिर जाँदै गरेको ना ३ ख ६९६४ नम्बरको ट्रक र विपरित दशाबाट भुस लोड गरेर आउँदै गरेको प्र १–०२–००१ ख ९०९७ नम्बरको ट्रक एकआपसमा ठोक्किएर दुर्घटना भएको महोत्तरीका प्रहरी प्रवक्ता डिएसपी प्रकाश विष्टले जानकारी दिए।
दुर्घटनामा ट्रक चालक महोत्तरीको बर्दिबास नगरपालिका ३ पाटुका ३० बर्षीय रुपेश बरायलीको मृत्यु भएको प्रहरीले जनाएको छ ।
उनको शुभ स्वस्तिक अस्पताल बर्दिबासमा उपचारको क्रममा मृत्यु भएको हो।
दुर्घटनामा कन्टेनर चालक ललितपुर माहाकाल गाउँपालिका ३ का ४२ वर्षीय राजु लामा, ट्रकमा सवार सर्लाहीको ईश्वरपुर नगरपालिका १२ घाँरीबथान बस्ने २२ वर्षीया सुजता खड्का र सहचालक निरज परियार गम्भीर घाइते भएका छन् ।
लामालाई थप उपचारको लागि काठमाडौं पठाइएको छ भने खड्का र परियारको बर्दिबासको एक अस्पतालमा उपचार भइरहेको बताईएको छ ।
