माधव पौडेल
बर्दिबास, महोत्तरी
नेपाली कांग्रेस महोत्तरी क्षेत्र नं. १ ले पार्टीको आसन्न १५औँ महाधिवेशनका लागि महाधिवेशन प्रतिनिधिसहित विभिन्न तहका नेतृत्व चयन गरेको छ। लामो समयदेखि चलेको आन्तरिक छलफल, सहमति र रस्साकस्सीपछि क्षेत्र नं. १ ले प्रतिनिधि तथा पदाधिकारीको टुङ्गो लगाएको हो।
क्षेत्र नं. १ का निवर्तमान क्षेत्रीय सभापति महेश झाका अनुसार नयाँ क्षेत्रीय सभापतिमा युवराज पोखरेललाई सर्वसम्मत चयन गरिएको छ। त्यसैगरी बर्दिबास नगरपालिकाको पार्टी सभापतिमा परशुराम गिरी र गौशाला नगरपालिकाको पार्टी सभापतिमा राजकुमार श्रेष्ठ चयन भएका छन्।
प्रदेशसभा क्षेत्रीय नेतृत्वतर्फ क्षेत्र नं. १(क) को सभापतिमा विजयकुमार महतो र क्षेत्र नं. १(ख) को सभापतिमा राधेश्याम भगत सर्वसम्मत निर्वाचित भएका छन्।
क्षेत्रीय नेतृत्वले महाधिवेशनका लागि क्षेत्र नं. १ बाट ३३ जना महाधिवेशन प्रतिनिधिको नाम पनि टुङ्गो लगाएको जनाएको छ। खुलातर्फ र विभिन्न समावेशी समूहअन्तर्गत प्रतिनिधिहरू चयन गरिएको बताइएको छ।
३३ जना महाधिवेशन प्रतिनिधि
क्षेत्र नं. १ बाट महाधिवेशन प्रतिनिधिका रूपमा उषा देवकोटा, बसन्ती अर्याल, देवकुमारी पौडेल, सबिना, सुमित्रा कुमारी कार्की, डा. मुकेश राज काफ्ले, प्रह्लाद कुमार क्षेत्री, महेश कुमार झा, वीरेन्द्र चौधरी, अशोक कोइराला, रामराजाप्रसाद शाह, मदन छगौले, पोषण थापा, शिशिर पोखरेल, सुरेश प्रसाद यादव, इन्द्रप्रसाद ढुंगेल, सीताराम, शत्रुधन प्रसाद गुप्ता, मविना पाण्डे कार्की, सूर्यबहादुर स्याङतान, लक्ष्मण सिंह, पुण्य प्रसाद गौतम, ओमनारायण महासेठ, विजय मण्डल र उत्तम सिंह राना रहेका छन्।
त्यस्तै समानुपातिकतर्फ सोमेन्द्र सार्की, सम्झना विश्वकर्मा, ज्योतिलाल स्याङतान, शान्तिकुमारी सिंह, मन्दिप भारती, रेखा कुमारी यादव, तारादेवी महतो, उपेन्द्र ठाकुर, संजयकुमार महतो र शेष मलिक रहेका छन्।
प्राप्त विवरणअनुसार खुला तथा समावेशी समूह मिलाएर क्षेत्रबाट ३३ जना प्रतिनिधि चयन गरिएको हो।
सहमतिबाट नेतृत्व चयन, असन्तुष्टि पनि सार्वजनिक
महाधिवेशन प्रतिनिधि तथा विभिन्न तहका नेतृत्व चयन गर्ने क्रममा लामो समयसम्म आन्तरिक छलफल र रस्साकस्सी चलेको थियो। अन्ततः धेरै पदमा सर्वसम्मतिको प्रयासबाट नेतृत्व चयन गरिएको क्षेत्रीय नेताहरूले बताएका छन्।
तर प्रतिनिधि चयनपछि भने कांग्रेसभित्रै असन्तुष्टिका स्वरहरू पनि सार्वजनिक भएका छन्। प्रतिनिधिमा नसमेटिएका केही नेता तथा कार्यकर्ताले सामाजिक सञ्जालमार्फत आफ्नो असन्तुष्टि व्यक्त गरेका छन्।
उनीहरूले चुनावी प्रक्रियामा जान नेतृत्व हिच्किचाएको र सर्वसम्मतिको नाममा आफूहरूलाई अवसरबाट वञ्चित गरिएको आरोप लगाएका छन्। यद्यपि, यी आरोपबारे क्षेत्रीय नेतृत्वको विस्तृत आधिकारिक धारणा भने सार्वजनिक रूपमा आएको छैन।
महाधिवेशन प्रतिनिधिहरूले प्रमाणपत्र बुझेर काठमाडौं पुगिसकेपछि मात्र क्षेत्रबाट नाम सार्वजनिक गरिएको विषयले पनि प्रतिनिधि चयन प्रक्रिया अन्तिम चरणसम्म चुनौतीपूर्ण रहेको देखाएको कांग्रेसका केही स्थानीय कार्यकर्ताहरूको भनाइ छ।
पुराना नेता हमालले छोडे पद
यसपटकको अधिवेशनमा नेपाली कांग्रेस महोत्तरीका पुराना नेता चिरञ्जीवी हमाल भने कुनै पनि पदमा नबसेको बताइएको छ। हमालले पार्टीमा नयाँ पुस्तालाई अवसर दिनुपर्ने भन्दै आफू पदको प्रतिस्पर्धाबाट अलग बसेको कांग्रेसका स्थानीय नेताहरूले बताएका छन्।
पुरानो पुस्ताका नेताले नयाँ पुस्तालाई नेतृत्वमा आउन ठाउँ छोड्नु र नयाँ पुस्ताले पार्टीको जिम्मेवारी सम्हाल्नु कांग्रेसभित्र पुस्तान्तरणको बहससँग पनि जोडिएको छ।
केन्द्रमा महाधिवेशनको तयारी तीव्र
नेपाली कांग्रेसले १५औँ केन्द्रीय महाधिवेशनका लागि विभिन्न तहका अधिवेशन तथा निर्वाचन प्रक्रिया अघि बढाएको छ। पार्टीको निर्वाचन कार्यतालिकाअनुसार प्रतिनिधिसभा क्षेत्रीय अधिवेशनबाट महाधिवेशन प्रतिनिधि चयन गर्ने कार्यक्रम राखिएको थियो।
पार्टीको पछिल्लो सूचनाअनुसार विभिन्न स्थानमा मौसमका कारण अधिवेशन प्रक्रियामा कठिनाइ आएपछि केही क्षेत्रको निर्वाचन कार्यक्रम स्थानीय अवस्था हेरी असोज १३ गतेभित्र सम्पन्न गर्ने व्यवस्था गरिएको थियो।
यसैबीच कांग्रेसले १५औँ महाधिवेशनको उद्घाटन समारोह असोज १८ गते काठमाडौंको खुलामञ्चमा गर्ने जनाएको छ।
महोत्तरी क्षेत्र नं. १ बाट चयन भएका महाधिवेशन प्रतिनिधिहरू अब केन्द्रीय महाधिवेशनमा सहभागी हुनेछन्। क्षेत्रीय तहमा सहमतिबाट नेतृत्व चयन भए पनि प्रतिनिधि छनोटलाई लिएर देखिएको असन्तुष्टिले भने आगामी दिनमा क्षेत्रीय राजनीतिमा यसको प्रभाव कस्तो पर्छ भन्ने विषयलाई चासोका साथ हेरिएको छ।