आज्ञा खबर

चितवन

राष्ट्रिय स्वतन्त्र पार्टी –रास्वपा_ को महाधिवेशनमा पूर्व सञ्चार तथा सूचना प्रविधिमन्त्री तथा प्रतिनिधिसभा सदस्य जगदीश खरेलले खुला तर्फ केन्द्रीय सदस्य पदमा उम्मेदवारी दिएका छन्। उम्मेदवारी दर्ता गर्दै उनले पार्टीको परिवर्तनकारी अभियानलाई थप सुदृढ, संस्थागत र परिणाममुखी बनाउने प्रतिबद्धता व्यक्त गरेका छन्।

रास्वपाले आफ्नो स्थापना कालदेखि नै सुशासन, पारदर्शिता, जवाफदेहिता र पुराना राजनीतिक अभ्यासको विकल्पका रूपमा नयाँ राजनीतिक संस्कारको वकालत गर्दै आएको छ। यही अभियानलाई संगठनभित्र अझ प्रभावकारी ढंगले संस्थागत गर्न आफूले उम्मेदवारी दिएको खरेलको भनाइ छ। खरेलले पार्टी केवल निर्वाचन जित्ने माध्यम नभई जनताले खोजेको परिवर्तनको वाहक भएको उल्लेख गर्दै संगठनलाई अझ लोकतान्त्रिक, उत्तरदायी र सदस्यमुखी बनाउन आफ्नो भूमिका रहने बताएका छन्।

पत्रकारिता क्षेत्रबाट सार्वजनिक जीवन सुरु गरेका खरेल सुशासन, सार्वजनिक उत्तरदायित्व र लोकतान्त्रिक मूल्यका पक्षमा निरन्तर आवाज उठाउने व्यक्तित्वका रूपमा परिचित छन्। सञ्चारकर्मीका रूपमा उनले राज्यका नीति, सेवा प्रवाह, सुशासन तथा जनसरोकारका विषयमा लामो समयदेखि कलम चलाएका थिए। पत्रकारितामार्फत समाज र राज्यका संरचनागत समस्या उजागर गर्ने तथा सुधारका लागि बहस सिर्जना गर्ने उनको भूमिकालाई धेरैले सकारात्मक रूपमा स्मरण गर्ने गरेका छन्।

राजनीतिसँगै अध्ययन र अनुसन्धानमा पनि सक्रिय खरेल हाल विद्यावारिधि अध्ययनको अन्तिम चरणमा छन्। सार्वजनिक नीति, शासन प्रणाली तथा समसामयिक राजनीतिक विषयमा उनको गहिरो रुचि र अध्ययनले उनलाई नीतिगत बहसमा सक्षम र तथ्यमा आधारित धारणा राख्ने नेताका रूपमा स्थापित गरेको समर्थकहरूको भनाइ छ।

पूर्व सञ्चारमन्त्रीको जिम्मेवारी सम्हालिसकेका खरेलले राज्य संयन्त्र, नीति निर्माण प्रक्रिया तथा प्रशासनिक सुधारका विषयलाई नजिकबाट बुझेका छन्। जटिल विषयलाई गहिराइमा पुगेर विश्लेषण गर्ने, तथ्यका आधारमा निर्णय लिनुपर्ने पक्षमा वकालत गर्ने तथा संस्थागत सुधारलाई प्राथमिकता दिने उनको कार्यशैलीलाई पार्टीभित्र सकारात्मक रूपमा हेरिएको छ।

रास्वपाको उदयसँगै नेपाली राजनीतिमा नयाँ पुस्ताको सहभागिता, सुशासनको माग र वैकल्पिक राजनीतिक शक्तिको आवश्यकता विषयले व्यापक बहस पाएको छ। यही परिवर्तनको लहरलाई स्थायित्व दिन सक्षम, अध्ययनशील र प्रतिबद्ध नेतृत्व आवश्यक रहेको भन्दै खरेलले आफूलाई त्यस अभियानको एक जिम्मेवार सहयात्रीका रूपमा प्रस्तुत गरेका छन्।

पार्टीका नेता–कार्यकर्तामाझ परिचित खरेलले संगठन विस्तार, जनचासोका विषय उठान तथा पार्टीको मूल एजेण्डालाई जनस्तरसम्म पुर्‍याउन महत्वपूर्ण भूमिका खेल्न सक्ने भनाइ छ। महाधिवेशन प्रतिनिधिहरूसँग मत माग्दै उनले रास्वपालाई अझ बलियो, सक्षम र विश्वसनीय राजनीतिक शक्तिका रूपमा स्थापित गर्न आफ्नो प्रतिबद्धता दोहोर्‍याएका छन्।

रास्वपाको आगामी नेतृत्व चयनलाई पार्टीको भावी दिशा तय गर्ने महत्वपूर्ण अवसरका रूपमा हेरिएको छ। यस्तो अवस्थामा केन्द्रीय सदस्य पदका उम्मेदवार खरेलले परिवर्तनको अभियानलाई निरन्तरता दिने, जनताको भरोसा जोगाउने र संगठनलाई थप सुदृढ बनाउने एजेण्डासहित प्रतिनिधिहरूसामु आफ्नो उम्मेदवारी प्रस्तुत गरेका छन्।