आज्ञा खबर
जनकपुरधाम
मधेश प्रदेशका मुख्यमन्त्री सतीशकुमार सिंहले मापदण्ड नपुर्याएर अबैध रुपमा सञ्चालनगरीरहेका अस्पताललाई बन्द गरेर साँचो बुझाउन निर्देशन दिएपछि अस्पताल सञ्चालकहरू प्रतिकार गर्न संगठित भएका छन् । मुख्यमन्त्री सिंहले अस्पतालहरूको छड्के अनुगमन गर्नै क्रममा अनावश्यक तनाव दिएको भन्दै जनकपुरधामका अस्पताल सञ्चालकहरूले ‘प्राइभेट हस्पिटल एसोसिएसन जनकपुरधाम’ नामक नयाँ संगठन स्थापना गरेका छन् ।

उक्त एसोसिएसनको अध्यक्षमा डा. सरोजकुमार ठाकुरलाई चयन गरिएको छ भने उपाध्यक्षमा रामभरोस महतो, सचिवमा आविद हुसेन, कोषाध्यक्षमा सञ्जय मण्डल र सहसचिवमा डा. सुभाषचन्द्र यादवसहित २५ सदस्यीय समिति गठन गरिएको छ ।

मुख्यमन्त्री सिंहले नियोजित रूपमा अस्पताल सञ्चालकहरूलाई अनावश्यक तनाव दिइरहेको, अनुसन्धानका लागि छुट्टै निकाय रहे पनि आफैँ अनुगमनमा खटिएको र सबै अस्पताललाई अवैध देखाउने गरी प्रचारबाजी गरिरहेको आरोप उनीहरूले लगाएका छन् ।