आज्ञा खबर
मकवानपुर
मकवानपुरमा नेपाली सेना सवार ट्रकमा आगलागी भएको छ।
जिल्लाको थाहा नगरपालिका–४ स्थित कुर्सी मोडमा त्रिभुवन राजपथको दामन–शिखरकोट सडक खण्डअन्तर्गत कुर्सी मोडमा भएको आगलागीबाट ट्रक पूर्ण रूपमा क्षति भएको हो।
चनवनबाट तालिमका लागि रेकी गर्न सिम्भञ्ज्याङतर्फ जाँदै गरेको नेपाली सेना ७ नम्बर बाहिनीको बा १ ग ३४३६ नम्बरको ट्रकमा आज दिउँसो आगलागी भएको इलाका प्रहरी कार्यालय पालुङले जनाएको छ।
ट्रकको सापट भाँच्चिएपछि ट्रकलाई सडकको छेउमा लगाउन खोज्दा अचानक आगो लागेको हो। सापट भाँच्चिएर डिजेल ट्यांकीमा लागेर डिजेल चुहिएर आगलागी भएको प्रहरीले जनाएको छ।
ट्रकमा १८ जना नेपाली सेना सवार रहेकोमा आगलागीबाट मानवीय क्षति भने भएको छैन। थाहा नगरपालिकाको दमकलले ट्रकमा लागेको आगो नियन्त्रणमा लिइसकेको बताईएको छ।
