आज्ञा सम्वाददाता
धनुषा
धनुषामा जनमत पार्टीबाट उपमेयरका महिला उम्मेदवार र तिनका पतिमाथि काँग्रेस कार्यकर्ताले शुक्रबार दिउँसो कुटपिट गरेका छन ।
क्षीरेश्वरनाथ नगरपालिकामा उपमेयर पदकी उम्मेदवादर विनिता पाठक र उनका पति जितेन्द्र पाठकमाथि कुटपिट भएको हो ।
आफू र आफ्नी श्रीमती विनितालाई काँग्रेस कार्यकर्ताले हातपात गरेको जितेन्द्र पाठकले आरोप लगाएका छन् ।
स्थानीय काँग्रेस कार्यकर्ता विजय यादवले कुटपिट गरेको जितेन्द्रको आरोप छ ।
सिके राउत नेतृत्वको जनमत पार्टीबाट उपमेयरकी उम्मेदवार पाठकको घर धनुषाको क्षिरेश्वरनाथ नगरपालिका वडा नं. १० प्रस्टोकीमा पर्छ ।
‘मेरो श्रीमान प्रचारप्रसाको लागि जाँदै हुनुहुन्थ्यो । घरबाट निस्केपछि केहि पर मेरो श्रीमानमाथि कुटपिट भइरहेको जानकारी पाएँ । म जाँदा उहाँको जगल्टा विजयले समातेर कुटपिट गरिरहेका थिए । छुट्टाउन गएपछि मलाई पनि उनले कुटपिट गरे ।’ उम्मेदवार नविताले सुनाइन् ।
उनले आफू जनमत पार्टीको उम्मेदवार भएकै कारण काँग्रेस कार्यकर्ताले निहु खोजेर कुटपिट गरेको भन्दै कारबाहीको माग गरिन् ।
