सुभद्रा भुजेल
बर्दिवास
खाना पकाउने एलपी ग्यासको आपूर्ति मागअनुसार हुन नसक्दा महोत्तरीको बर्दिवासमा ग्यासको अभाव चरम रुपमै देखिन थालेको छ। बजारमा मागअनुसार ग्यास उपलब्ध हुन नसक्दा सर्वसाधारण उपभोक्तासँगै होटल तथा रेस्टुरेन्ट व्यवसायसमेत प्रभावित हुन थालेका छन्।
ग्यास डिलरहरूले आपूर्तिकर्ताबाट मागअनुसार सिलिन्डर प्राप्त गर्न नसकेको बताएका छन्। पर्याप्त मात्रामा ग्यास नआउँदा उपभोक्ताले समयमै सिलिन्डर पाउन नसकेको र कतिपय अवस्थामा ग्यासका लागि लामो समय कुर्नुपर्ने अवस्था सिर्जना भएको छ।
बर्दिवासका होटल तथा रेस्टुरेन्ट व्यवसायीहरूका अनुसार नियमित रूपमा आवश्यक पर्ने ग्यास उपलब्ध नहुँदा खाना पकाउने काम प्रभावित हुन थालेको छ। ग्यासको अभाव अझै बढ्दै गएमा होटल व्यवसाय सञ्चालनमै समस्या आउन सक्ने व्यवसायीहरूको भनाइ छ।
उपभोक्ताहरूले पनि बजारमा सहज रूपमा ग्यास उपलब्ध हुने व्यवस्था मिलाउन सम्बन्धित निकायसँग माग गरेका छन्। उनीहरूका अनुसार खाना पकाउने अत्यावश्यक वस्तुमा अभाव सिर्जना हुँदा दैनिक घरायसी कामकाजसमेत प्रभावित हुने अवस्था आउन सक्छ।
होटल तथा पर्यटन व्यवसायी संघ महोत्तरीका अनुसार बर्दिवास क्षेत्रमा होटल तथा रेस्टुरेन्टको संख्या बढ्दै गएको अवस्थामा ग्यासको नियमित आपूर्ति अत्यन्त आवश्यक छ। मागअनुसार आपूर्ति हुन नसक्दा व्यवसायीहरू थप समस्यामा पर्ने संघको भनाइ छ।
यस बिषयमा सम्बन्धित निकायले बजारको वास्तविक माग र उपलब्ध आपूर्तिबीचको अवस्थाको अनुगमन गरी ग्यासको नियमित तथा सहज आपूर्ति सुनिश्चित गर्नुपर्ने व्यवसायी र उपभोक्ताको माग छ। समयमै समस्या समाधान नगरिए एलपी ग्यासको अभावले बर्दिवासको घरायसी भान्सादेखि होटल व्यवसायसम्म थप प्रभावित हुने खतरा बढेको छ।
