आज्ञा खबर,
बर्दिवास
महोत्तरीको बर्दिवास आज भक्तिभाव, आस्था र उत्साहको केन्द्र बनेको छ। छठपर्वको तेस्रो दिन आज अस्ताउँदो सूर्यलाई अर्घ्य दिने विशेष अवसर — का साथ बर्दिवासका बिभिन्न पोखरी,रातु खोलाका किनारहरूमा जनसागर उर्लिएको छ। बिहानदेखि नै महिलाहरू व्रत र विधिवत् पूजागर्ने तयारीमा व्यस्त देखिन्थे, भने बेलुकी अस्ताउँदो सूर्यका किरणहरू साक्षी राखी भक्तजनहरूले सूर्यदेव र छठी माईलाई अर्घ्य अर्पण गर्नेछन्।
रातु खोला र स्थानीय पोखरीहरूमा जनसागर
बर्दिवासको रातु खोला र बिभिन्न पोखरी तथा टोल–वस्तीका सामुदायिक जलाशयहरूमा व्रतधारी महिला, पुरुष र बालबालिकाको भीडले रमाइलो दृश्य प्रस्तुत गर्यो। रंगीन सजावट, माटाका दियोहरू, केरा, नरिवल, सख्खर, ठकुवा, र भुसुआ जस्ता प्रसाद हरु जलाशयहरूको किनारमा ओसा र्नेको लहर चलेको देखि यो व्रतधारी महिलाहरू परम्परागत पहिरनमा — पहेंलो, रातो र सुन्तला रङका साडीमा — सुसज्जित देखिन्थे। उनीहरू हातमा ढकना, सुपा बोकेर अस्ताउँदो सूर्यतर्फ अर्घ्य दिँन गीत गाइरहेका थिए —
“कांचा ही बांस के बहंगिया, बहंगी लचकत जाए, पिया जी अर्घ देबो सूर्य भगवान…”
यो गीत र भावनाले वातावरण लाई भक्तिभावमा डुबाएको थियो।
भक्तिभाव र शुद्धताको पर्व
छठ पर्व केवल धार्मिक अनुष्ठान मात्र होइन, शुद्धता, संयम र समर्पणको प्रतीक मानिन्छ। चार दिनसम्म चल्ने यो पर्वमा व्रतालुहरूले पानी पनि नखाई, केवल सूर्यदेवको आराधना र आत्मशुद्धिमार्फत परिवारको कल्याणको कामना गर्छन्।
आजको दिन अस्ताउँदो सूर्यलाई अर्घ्य दिने कर्म सम्पन्न भएपछि व्रतालुहरू भोलि बिहान उदाउँदो सूर्यलाई अर्घ्य दिएर व्रत समापन गर्ने तयारी गर्दछन्।
नगरपालिकाको व्यवस्थापन र सुरक्षामा विशेष ध्यान
बर्दिवास नगरपालिका र स्थानीय प्रशासनले छठघाटहरूमा सुरक्षा, स्वच्छता व्यवस्थापनमा विशेष ध्यान दिएको छ। नगरप्रमुख प्रह्लाद कुमार क्षेत्रीका अनुसार—
“छठ केवल धार्मिक पर्व होइन, यो हाम्रो साझा संस्कृतिको पहिचान हो। बर्दिवासलाई आस्थाको केन्द्रका रूपमा उजागर गर्न नगरपालिका पूर्ण सहयोगमा जुटेको छ।”
स्थानीय युवाहरूले स्वयंसेवकका रूपमा घाटहरूमा सहयोग गरेका छन्। प्रहरी र ट्राफिक टोली भीड व्यवस्थापनमा खटिने बताईएको छ।
संस्कृति, संगीत र सामूहिकता
पर्वले बर्दिवासका शहर तथा गाउँलाई रंगीन बनाएको छ। गीत–संगीतको धुन, मन्दिरहरूको घण्टी र लोकसंगीतका तालले बर्दिवासमा उल्लास फैलाएको छ। बजारमा चहलपहल, फलफूल, मिष्ठान्न र पूजा सामग्री किन्न आउने भक्तजनहरूको भिडले आर्थिक गतिविधिमा पनि चहक ल्याएको छ।
यसैक्रममा स्थानीय व्यवसायी राजेश चौधरी भन्छन्—“छठको बेला बजारमा व्यापार बढ्छ, सबै मानिसको मनमा खुशी र श्रद्धा हुन्छ। यो पर्व हाम्रो आर्थिक र सांस्कृतिक जीवनको भाग हो।”
भोलि उदाउँदो सूर्यलाई अर्घ्य
आज अस्ताउँदो सूर्यलाई अर्घ्य दिएपछि व्रतालुहरू रातभर जाग्राम बस्ने तयारीमा छन्। भोलि बिहान सबेरै उदाउँदो सूर्यलाई अर्घ्य दिएर व्रत तोड्ने परम्परा छ। यही क्षणलाई छठ पर्वको शिखर मानिन्छ।
संस्कृति र सहअस्तित्वको प्रतीक
बर्दिवासमा छठ केवल मधेसी समुदायको पर्व मात्रै होइन, सबै जात, धर्म र क्षेत्रका मानिसहरूको साझा पर्वका रूपमा मनाइन्छ। विभिन्न वर्ग, समुदाय र दलका प्रतिनिधिहरू पनि आज घाटहरूमा उपस्थित हुने परम्परा रहिआएकोले समेत यो समावेशी भावनाले नै छठलाई बर्दिवासको सांस्कृतिक पहिचानको मेरुदण्ड बनाएको हो।
छठ पर्वको तेस्रो दिन बर्दिवासमा आस्था, अनुशासन र सामूहिकताले सिंगारिएको देखियो। अस्ताउँदो सूर्यको अर्घ्यसँगै हजारौँ व्रतालुहरूको मनमा उज्यालोको कामना, परिवारको सुख, समृद्धि र स्वास्थ्यको प्रार्थना प्रतिध्वनित हुनेगरी भोलि उदाउँदो सूर्यलाई अर्घ्य दिँदै यो महान् पर्व सम्पन्न हुनेछ।
