आज्ञा खबर
बर्दिवास
महोत्तरीक गाम-बहुला सभ में बरखौं सँ चली आबि रहल अर्मपर्म, अर्थात् एक-दोसरक खेती-काम सभकेँ आपसी मदद आ आलोपालो कय क’ पूरा करब, आब खत्म होइ क’ अवस्था में अछि। किछु वर्ष पहिने महोत्तरी में खेत पर बाली रोपबाक सँ ल’ क’ बीउ उखरबाक धरी लगैत आस-पासक पड़ोसी सभ मिलि क’ करैत छलथि, मुदा आब एहन सामूहिक सहयोग भेटब मुस्किल भ’ गेल अछि।
बर्दिवास नगरपालिका–१२ बिजलपुराक अनुभवी किसान श्याम महतो कहैत छथि, “पहिने त’ खेतालाक खोज होइत छल, मुदा आइ खेतालाक लेल पैसा दियौ तँहो पाबि क’ मुस्किल अछि। युवा लोकनि श्रम शक्ति छोड़ि क’ सहर आ विदेश चलि गेल छथि, जाहि सँ गाम में परंपरागत काज सभमे बहुत कमी आयल अछि।”
ओहि अनुसार, खेतालाक अभावक कारण खेतीमे आधुनिक तकनीक आ रासायनिक विषादीक प्रयोग बढ़ि गेल अछि, जे खेतीक एकमात्र विकल्प बनि गेल अछि। “आधुनिक युगक युवा लोकनि खेती दिस कम ध्यान द’ रहल छथि, तैं परंपरागत अर्मपर्म जेकाँ सांस्कृतिक सहयोग धीरे-धीरे खत्म भ’ रहल अछि।”
तेहेनहि, बर्दिवास–१० खयरमारा क्षेत्रक किसान भीमनाथ गौतम कहैत छथि, “अर्मपर्म मात्र काज करबाक मेल नहि छल, ई भावनात्मक आ सामाजिक सम्बन्ध जोड़बाक सांस्कृतिक सेतु छल। हम लोकनि गीत गाबैत, खाजा बाटि क’ काज करैत छलहुँ, जे समुदायमे एकता बढ़बैत छल। मुदा आइ ओ सभ परंपरा खत्म होयबाक कगार पर अछि।”
गाम में अर्मपर्मक ई परंपरागत प्रणाली नजिकक लोकसभक बीच विश्वास आ मेलजोल बढ़ाबय संग-संग श्रमक बँटवारा क’ काजकेँ सहज आ रमाइलो बनेबाक काज करैत छल। मुदा हालहि में युवाक पलायन, आधुनिक कृषि यंत्रक प्रयोग आ वैदेशिक रोजगारक कारण गामक सामूहिक सहयोग कमजोर पड़ि गेल अछि, जे स्थानीय कृषक लोकनि कहैत छथि।
स्थानीय लोकनि लेल ई परंपरा केवल खेती नै, बल्कि सामाजिक आ सांस्कृतिक पहिचान सेहो छल। मुदा आजुक युगमे तकनीक आ आधुनिकताक कारण जखन सुविधा भेटल अछि, तखन एहि परंपराक स्थान लेल गेल अछि, मुदा जे आपसी भरोसा आ सद्भावक एहिसँ अभाव अछि, तकर पूर्ति आबि नहि सकल अछि।
