माधव पौडल
वर्दिवास

वर्दिवास नगरपालिकाक तरफ सँ नगरपालिका क्षेत्रक मुख्य सड़क आ चौक सभमे सीसीटीभी कैमरा लगाउ काज शुरू कएल गेल अछि। पहिल चरणमे वर्दिवासक चारि टा प्रमुख नाकामे अत्याधुनिक सुविधा सँ युक्त एएनपीआर (Automatic Number Plate Recognition) कैमरा – जे सड़क पर चलैत गाड़ी सभक नम्बर पढ़ैछ – कुल ४ टा लगाओल गेल अछि।

नगरपालिका जानकारी देलक जे पहिने सँ जड़ित सीसीटीभी कैमरा सभक मर्मत-संभार सेहो कएल गेल अछि। ओतबे नहि, सभटा वडा कार्यालय सभमे अत्याधुनिक प्रविधिक सीसीटीभी पहिनहि लगाओल जा चुकल अछि।

नगर प्रमुख प्रह्लाद कुमार क्षेत्रीक अनुसार, आगाँ कऽ चरणबद्ध ढंग सँ नगरक विभिन्न ठाम सभमे सेहो सीसीटीभी कैमरा लगाओल जाएत। ओ कहलनि जे पहिले विभिन्न संघ-संस्थासभ कहने छल जे ओ सभ सीसीटीभी लगाओत, से कारणे किछु काल धरि प्रतीक्षा कएल गेल। मुदा जखन ओ सभ सफल नहि भऽ सकल, तखन नगरपालिका अपन स्रोत सँ ई काज शुरू केलक।

नगरवासी सभक शान्ति-सुरक्षा केँ प्राथमिकता दैत ई पहल लऽ गेल अछि। ओ विश्वास प्रकट कएलनि जे सड़क दुर्घटना, चोरी-चपाटी जेकाँ समस्या सभमे कमी आबि सकैत अछि।

नगरपालिकाक प्रमुख प्रशासकीय अधिकृत राममणि अधिकारी कहलनि जे सभटा वडा कार्यालयमे सीसीटीभी पहिनहि लगाओल जा चुकल अछि, आ आगाँवला आर्थिक वर्षमे सभटा स्वास्थ्य संस्था आ शैक्षिक संस्थासभमे सेहो कैमरा जड़बाक योजना अछि।

सीसीटीभी लगैले वडा कार्यालय सभक गतिविधि पर कार्यालय सँ बैसिकय निगरानी करब सहज भऽ गेल अछि। बजारक मुख्य चौक सभमे शान्ति-सुरक्षा मजबूत बनेबाक उद्देश्यसँ ई पहल लेल गेल अछि, आ अधिकारीक विश्वास अछि जे एहि सँ सुरक्षा निकायक काजमे सहयोग भेटत।

ई सीसीटीभी सभक प्रत्यक्ष निगरानी इलाका प्रहरी कार्यालय वर्दिवास द्वारा कएल जाएत। नीति, कार्यक्रम आ बजटक अनुसार चालू आर्थिक वर्षमे ई कार्यान्वयन भेल अछि। नगरपालिकाक अनुसार, आगामी वर्षमे सेहो अन्य स्थान सभमे सीसीटीभी कैमरा जड़बाक लेल बजट पारित कएल जाएत।

आपराधिक गतिविधि आ सड़क दुर्घटनाक कमी आनि, बजार क्षेत्र केँ शान्त, सुरक्षित, सुन्दर आ व्यवस्थित बनेबाक उद्देश्यसँ ई पहल कएल गेल अछि।