काठमाडौं –
तीन वर्ष भन्दा लामो समयपछि राष्ट्रिय खेलकुद परिषद् (राखेप) को बोर्ड बैठक शुक्रबार बस्दैछ । लुम्बिनी प्रदेशमा २०७५/०७६ मा आठौं राष्ट्रिय खेलकुद आयोजना हुनु अघि राखेपको १ सय ११ औं बैठकयता अर्को बैठक बस्न सकेको थिएन ।युवा तथा खेलकुद मन्त्री महेश्वजंग गहतराजको अध्यक्षतामा बोर्डको १ सय १२ औं बैठक सिंहदरबारस्थित खेलकुद मन्त्रालयमा बिहान ११ बजे सुरु हुने बताइएको छ ।
राखेप सदस्य सचिव टंकलाल घिसिङका अनुसार बैठकमा मुख्यतः नवौं राष्ट्रिय खेलकुद र एसियाली खेलकुदको सहभागिता विषयमा छलफल हुनेछ ।त्यस्तै विविधमा अन्य थुप्रै विषय रहेको सदस्य सचिव घिसिङले जानकारी दिए । नवौं राष्ट्रिय खेलकुद जेठ २२ देखि २८ गते सम्म गण्डकीको राजधानी पोखरामा गर्ने मन्त्रीपरिषद्ले चैत ३० गते निर्णय गरिसकेको छ । चीनमा भदौंमा आयोजना हुने एसियाली खेलकुदमा नेपालले कति खेलमा भाग लिने निर्णय मात्र नगरेको होइन तयारी समेत सुरु गरेको छैन ।
बोर्ड बैठकमा गहतराजले मन्त्रीस्तरीय निर्णयबाट नियुक्त गरेका र हटाएका सदस्यहरुलाई भने डाकिएको छैन । त्यसको मुद्दा अदालतमा विचाराधिन रहेकोले ती सदस्यलाई बोर्ड बैठकमा नबोलइएको घिसिङले प्रष्ट पारेका छन् । मन्त्रीपरिषद्बाट नियुक्त भएका राखेप सदस्य भने बैठकमा सहभागी हुने उनले जानकारी दिए ।१३ औं दक्षिण एसियाली खेलकुद (साग) आयोजनका समयमा होस् वा त्यसपछि राष्ट्रिय खेलकुद विकास ऐन २०७७ को लागूपछि सदस्य सचिवलगायत सदस्यहरुको नयाँ नियुक्ती होस् त्यसयता पनि बोर्ड बैठक बस्न सकेको थिएन ।
तत्कालिन सदस्य सचिव रमेशकुमार सिलवालको बर्खास्ती र नयाँ सदस्य सचिवमा टंकलाल घिसिङको नियुक्तीपछि राखेप झनै काम गर्न नसक्ने अवस्थामा पुगेको थियो ।सिलवालले सर्वोच्चमा रिट दायर गरेसँगै राखेप झण्डै ४ महिना नेतृत्व विहिन भएको थियो । सिलवालको रिटलाई चैत २२ गते सर्वोच्चले खारेज गरेसँगै घिसिङले पुनः राखेपको नेतृत्व सम्हालेका थिए ।
