आज्ञा सम्वाददाता
जनकपुरधाम
करिब दुई वर्ष बित्नलाग्दा समेत नेपालकै एकमात्र रेल्वे सेवा सञ्चालनमा नहुँदा स्थानीय एवं रेलका कर्मचारी आत्तिएका थिए ।
तर, अब भने रेल उद्घाटन हुने मिति शनिवार तय भएपछि स्थानीय, व्यापारी कर्मचारी सबै खुसी भएका छन् । पटकपटक सञ्चालन हुने भनिए पनि सञ्चालनमा आउन नसकेकोे जनकपुर जयनगर–कुर्था रेलसेवा औपचारिक रूपमा शनिवार उद्घाटन तयारीका लागि कर्मचारीहरू खटिएका छन् ।
यही चैत ८ गते मङ्गलबार सरकारको सिफारिसमा राष्ट्रपति विद्यादेवी भण्डारीले रेल–वे अध्यादेश, २०७८ जारी गरेपछि रेल–वे कम्पनी रेल सेवा सञ्चालनका लागि जुटेको हो । ‘रेल सेवा सञ्चालनका लागि सम्पूर्ण तयारी फागुन १ गतेभन्दा पहिले नै भए पनि कानुन अभावमा औपचारिक रूपमा सञ्चालन गर्न सकेका थिएनौँ । तर, अध्यादेश जारीपछि भने उद्घाटन मिति तय भएको हो,’ नेपाल रेल–वे कम्पनी लिमिटेडका महाप्रबन्धक निरञ्जन झाले भने ।
उनले नेपालका प्रधानमन्त्री शेरबहादुर देउवा र भारतका प्रधानमन्त्री नरेन्द्र मोदीद्वारा संयुक्त रूपमा भर्चुअल माध्यमबाट उद्घाटन गर्ने जानकारी दिँदै अब रेल सेवा सञ्चालनमा कुनै समस्या नहोस् भन्ने उद्देश्यले रेल–वेका कर्मचारी सेवा सञ्चालन तथा उद्घाटनमा कुनै कमिकमजोरी हुन नदिन जोडतोडका साथ तयारीमा जुटेको बताए । आउने १९ गते शनिबार नेपाल र भारतका प्रधानमन्त्रीले संयुक्त रूपमा उद्घाटन गर्ने कार्यक्रम तय भएको छ ।