आज्ञा सम्वाददाता
ओखलढुंगा
उदयपुरमा सवारी दुर्घटनामा परी घाइते भएका एक जनाको मृत्यु भएको छ । कटारी नगरपालिका–११ हर्देनीस्थित सिद्धिचरण राजमार्गमा भएको दुर्घटनामा परी ओखलढुंगा सुनकोसी गाउँपालिका–४ का ५४ वर्षीय खेमबहादुर कार्कीको वीर अस्पताल काठमाडौंमा उपचारका क्रममा आज बिहान मृत्यु भएको हो ।
दुर्घटनामा परी चालकसहित १३ घाइते भएका छन् । आइतबार दिउँसो ओखलढुंगाबाट उदयपुरको कटारीतर्फ आउँदै गरेको प्रदेश १–०७–००१ज ००११ नम्बरको जीप अनियन्त्रित भइ सडकबाट ५ मिटर तल झरी दुर्घटना भएको थियो । दुर्घटनामा चालकसहित गाडीमा सवार १४ जना घाइते भएका छन् ।
घाइते ओखलढुंगा मोलुङ–२ का २४ वर्षीय एकराज दाहाल र ३० वर्षीया पार्वता पोखरेलको विराटनगर नोबेल अस्पतालमा उपचार भइरहेको छ । कटारी अस्पतालमा उपचारार्थ रहेका १० जना घाइते उपचा पश्चात डिस्चार्ज भइसकेका छन् । गाडी चालक ओखलढुंगा सिद्धिचरण नगरपालिका–१ का २४ वर्षीय सञ्जिव घिमिरेलाई सामान्य उपचारपश्चात इलाका प्रहरी कार्यालय कटारीले नियन्त्रणमा लिइ दुर्घटना सम्बन्धमा थप अनुसन्धान भइरहेको १ नम्बर प्रदेश प्रहरी कार्यालय विराटनगरले जनाएको छ ।
