जनकपुरधाम । कुर्था– जनयनर रेल सेवा गत फागुन १ गतेदेखि नियमित रुपमा बिना यात्रु संचालन हुँदै आएको छ । तर यात्रुसहित कहिलेदेखि संचालन हुने सबैको चासोको विषय बनेको छ ।

लामो समयदेखि धनुषासहित आम नेपाली जनता रेल संचालनको पर्खाइमा रहेको भए पनि नेपाल सरकारले रेल संचालनमा चासो नदेखाएको सर्वसधारण जनताले आरोप लगाउंदै आएका छन् । पहिला कर्मचारी, ऐनको अभाव देखाएर रेल संचालनमा समय थपिदै आएका नेपाल सरकारलाई अब रेल संचालन नगर्ने कुनै आधार नरहेको अवस्थामा पनि रेल उद्घाटनको समय अहिले सम्म नतोक्नुले सरकारको मानसिकता प्रष्ट हुँदै गएको सर्वसाधारणको भनाई छ । जनकपुरधाम उपमहनगरपालिका–१ का शंकर साहले भने,‘ पटक पटक रेल संचालनको समय दिए पनि संचालन हुन सकेन । पछिल्लो समय एक सातादेखि रेल नियमित रुपमा संचालन भएपछि केही आशा भन्ने पलाएको छ । तर एक साता भईसक्दा पनि नेपाल र भारत सरकारबाट रेल उद्घाटनको मिति नतोकिंदा अहिले पनि विश्वस्त हुने अवस्थामा पुग्न सकेका छैनौ ।’ यता नेपाल रेल्वेको न्यारोगेजका वहुमूल्य कोईलाबाट सञ्चालन हुने इन्जिनहरुको उचित संरक्षणको अभावमा कवाडमा परिणत हुँदै गएको छ । नेपालले ती इन्जिनहरुको संरक्षणको लागि १७ वटा कर्मचारी खटाए पनि कर्मचारीहरुको लापावहीको कारण अर्बो मूल्य बराबरको सम्पत्ति घाम र पानीले खिया लागेर नष्ट हुने अवस्थामा पुगेको छ ।