कोशी नदीको बहाव बढ्यो, प्रशासनद्वारा ब्यारेज अनुगमन

आज्ञा खबर
सप्तरी

सप्तकोशी नदीमा बहाव बढ्दै गएपछि सुनसरी प्रशासनले विपद् प्रतिकार्यको तयारीका लागि प्रमुख जिल्ला अधिकारी वासुदेव घिमिरेसहित सुरक्षा निकायका प्रमुखहरूको टोलीले कोशी ब्यारेजको स्थलगत अनुगमन गरेको छ ।

कोशी ब्यारेजमा पानीको प्रवाह प्रतिसेकेन्ड एक लाख ५१ हजार १९५ क्युसेक पुगेको छ । ब्यारेजका २० वटा गेट खोलिएको छ । कोशीमा जलप्रवाह प्रतिसेकेन्ड एक लाख ५० हजार क्युसेक पुगेपछि उच्च सतर्कताका लागि रातो बत्ती बाल्ने गरिन्छ ।

अनुगमनपछि प्रमुख जिल्ला अधिकारी घिमिरेले बाढी, डुबान तथा कटानको जोखिमलाई मध्यनजर गर्दै जिल्लामा विपद् प्रतिकार्य योजना कार्यान्वयनमा रहेको बताए । उनले विपद् व्यवस्थापनमा संलग्न सबै निकायको जिम्मेवारी स्पष्ट रूपमा निर्धारण गरिएको तथा आवश्यक कार्यविधि समेत तयार गरिएको जानकारी दिए ।

प्रमुख जिल्ला अधिकारी घिमिरेले कोशी ब्यारेज पुल तथा कमजोर तटबन्धको मर्मत गरिएको जानकारी दिँदै बाढीका कारण कटान वा तटबन्धमा क्षति भएमा सम्बन्धित आयोजना, जिल्ला प्रशासन र सुरक्षा निकाय तत्काल तयारी अवस्थामा रहेको बताए ।

अनुगमनमा जिल्ला प्रहरी कार्यालय सुनसरीका प्रहरी प्रमुख केशव कुमार थेबे, राष्ट्रिय अनुसन्धान जिल्ला कार्यालय सुनसरीका उपअनुसन्धान निर्देशक विमल घिमिरेसहित सुरक्षा निकायका प्रतिनिधिको सहभागिता रहेको थियो ।

 

  • लोड हुँदैछ...
  • Loading...
  • लोड हुँदैछ...