प्रहरीले सोमबार राति करिब ९:१५ बजेको समयमा विशेष सूचनाको आधारमा लागूऔषध नियन्त्रण ब्युरो, शाखा कार्यालय बर्दिबास र इलाका प्रहरी कार्यालय बर्दिबासको संयुक्त टोलीले चेकजाँचका क्रममा उनीहरूलाई नियन्त्रणमा लिएको हो।

बर्दिबास नगरपालिका–३ गौरीडाँडा स्थित अस्थायी ट्राफिक प्रहरी पोष्ट अगाडि बी.पी. राजमार्गमा चेकिङका क्रममा बर्दिबासबाट काठमाडौँतर्फ जाँदै गरेको प्रदेश–०२–०१–००१ च ०४४१ नम्बरको प्राइभेट स्कोरपियो गाडी रोकी जाँच गर्दा लागूऔषध फेला परेको प्रहरीले जनाएको छ।

प्रहरीका अनुसार गाडीमा सवार नुवाकोट सूर्यगढी गाउँपालिका–४ बस्ने अन्दाजी ३१ वर्षीय अविरल परियारको दाहिने हातको मुठ्ठीमा कालो प्लास्टिकले बाँधी भित्र सेतो प्लास्टिकमा लुकाई छिपाई राखिएको अवस्थामा ब्राउन सुगर जस्तो देखिने पदार्थ बरामद गरिएको हो। उक्त पदार्थको तौल प्लास्टिकसहित ७५ ग्राम र शुद्ध तौल ७१.०४ ग्राम रहेको बताइएको छ।

सोही गाडीका चालक सिराहा मिर्चैया नगरपालिका–८ का २१ वर्षीय मुरली कुमार राय, साथै सिराहा मिर्चैया–१ का २४ वर्षीय रमन घिमिरे र मिर्चैया–७ का १९ वर्षीय सुनिल पटेललाई समेत प्रहरीले नियन्त्रणमा लिएको छ।

पक्राउ परेकाहरूलाई स्कोरपियो गाडीसहित थप अनुसन्धान तथा कारबाहीका लागि इलाका प्रहरी कार्यालय बर्दिबासमा बुझाइएको प्रहरीले जनाएको छ।