आज्ञा खबर
सिरहा
किर्ताे कागजात पेश गरी भ्रष्टाचार गरेको अभियोगमा सिरहाको एक माध्यमिक विद्यालयका शिक्षक विरुद्ध विशेष अदालत काठमाडौंमा आरोपपत्र दायर भएको छ ।
सिरहा जिल्ला महावीर माध्यमिक विद्यालय, चैनपुरमा कार्यरत शिक्षक टिकाबहादुर मगरविरुद्ध किर्ते शेक्षिक अध्यापन अनुमतीपत्र पेश गरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले मगरविरुद्ध आरोपपत्र दायर गरेको हो ।
शिक्षक सेवा आयोगबाट निमावि तहको अध्यापन अनुमति प्राप्त गरेका मगरले उक्त अनुमति पत्रलाई माध्यमिक तहको झुट्टा प्रमाण बनाएर पटक–पटक विद्यालयमा पेस गरेको आयोगले जनाएको छ ।
उनी सोही आधारमा हालसम्म माध्यमिक तहका शिक्षकका रूपमा कार्यरत रहँदै आएका थिए। राष्ट्रसेवक कर्मचारीका रूपमा ओहदा, सेवा, सुविधा र लाभ लिइरहेका उनले झुट्टा प्रमाणपत्र पेस गरी पद प्राप्त गर्नु भ्रष्टाचारजन्य कसुर भएको अख्तियारले ठहर गर्दै उनिविरुद्ध विशेष अदालत काठमाडौंमा आरोपपत्र दायर गरेको छ ।
उनलाई भ्रष्टाचार निवारण ऐन, २०५९ को दफा १६(१) अनुसार सजायको मागदाबी गर्दै विशेष अदालत, काठमाडौंमा आरोपपत्र दायर गरेको अख्तियार दुरुपयोग अनुसन्धान आयोगका प्रवक्ता राजेन्द्र कुमार पौडेलले जानकारी दिए ।
