आज्ञा खबर
सिरहा
सिरहाको भगवानपुर गाउँपालिका-४ कल्याणपुरस्थित प्राथमिक स्वास्थ्य केन्द्रमा सर्पदंशका बिरामी बालकको ज्यान गएपछि तनावपूर्ण अवस्था सिर्जना भएको छ। समयमै उपचार र एम्बुलेन्स नपाएका कारण बालकको मृत्यु भएको भन्दै आक्रोशित स्थानीयले स्वास्थ्य केन्द्रमा तोडफोड गर्नुका साथै हुलाकी राजमार्गमा चक्काजाम गरेका छन्।
सप्तरीको बलान बिहुल गाउँपालिका निवासी अरुण मण्डलका छोरा रोशन मण्डललाई सर्पले डसेपछि परिवारले आपत्कालीन उपचारका लागि उक्त स्वास्थ्य केन्द्र पुर्याएका थिए। तर, अस्पतालमा चिकित्सकको लापरबाही र एम्बुलेन्स चालकले गाउँपालिका अध्यक्ष उग्र नारायण यादवको अनुमतिबिना गाडी नचलाउने जिद्दी गरेपछि समयमा सुविधा पाउन नसकिएको स्थानीयको आरोप छ।
थप उपचारका लागि लहानतर्फ लैजाने क्रममा बाटोमै बालबालिकाको प्राण गएको परिवारले जनाएका छन्। घटनाको सत्यतथ्य बुझ्न र समाधान खोज्न बिहान ११ बजे तय गरिएको वार्तामा गाउँपालिका अध्यक्ष अनुपस्थित भएपछि प्रदर्शनकारी थप उग्र बनेका छन्। आन्दोलनको नेतृत्व गरिरहेका प्रविन्द यादव र इन्दल मण्डलले जनप्रतिनिधिको लापरबाहीका कारण स्थिति बिग्रिएको बताएका छन्।
अहिले आन्दोलनकारीहरूले सडकमा टायर र दाउरा बालेर यातायात पूर्ण रूपमा ठप्प पारेका छन्। तनाव नियन्त्रणमा लिन घटनास्थलमा बाक्लो संख्यामा नेपाल र सशस्त्र प्रहरी परिचालन गरिएको छ। प्रहरीले एम्बुलेन्स चालकको बयान, उपचारको कागजात र घटनाको समग्र पाटोबाट अनुसन्धान अगाडि बढाइएको जानकारी दिएको छ। यस विषयमा स्वास्थ्य संस्था र गाउँपालिका अध्यक्षबाट भने आधिकारिक धारणा आउन बाँकी छ।
