आज्ञा खबर

बर्दिवास

गत असोज १७ गतेदेखि १९ गतेसम्म लगातार परेका मुसलधारे वर्षाले बर्दिवास नगरपालिकाका विभिन्न वडामा ठूलो जनधन तथा भौतिक क्षति पुर्‍याएको छ। लगातारको वर्षाले वडा नं. ६, ७, ९ र १२ का बस्तीहरू समेत डुबानमा परे, बाली नष्ट भए, घरमा पानी पस्दा खाद्यान्न बिग्रियो, र दैनिक आम्दानीमा निर्भर विपन्न परिवारहरू असहाय बने।

तर, यस विपत्तिका बीचमा पनि राहत र सहकार्यको सकारात्मक ऊर्जा फैलिएको छ। बर्दिवास नगरपालिकाले मंगलबारदेखि सुरु गरेको राहत वितरण अभियानलाई बुधबार पनि निरन्तरता दिएको छ।
नगरपालिकाको विपद् व्यवस्थापन समितिको नेतृत्वमा सञ्चालित अभियानमा विभिन्न सामाजिक संस्थाहरूको सहकार्य उल्लेखनीय रहेको छ।

राहत वितरणमा सेभ द चिल्ड्रेन, सामुदायिक विकास तथा पैरवी मञ्च नेपाल, रोटरी क्लब अफ बर्दिवास, रोट्र्याक क्लब अफ बर्दिवास, नेपाल रेडक्रस सोसाइटी महोत्तरी उपशाखा बर्दिवास, र सी.आर.एस. नेपाल को सक्रिय भूमिका रहेको थियो।

राहत सामग्रीमा खाद्यान्न, लत्ता–कपडा, सरसफाइ सामग्री र अत्यावश्यक घरेलु वस्तुहरू वितरण गरिएको थियो।

कार्यक्रममा उपप्रमुख, वडाध्यक्षहरू, स्वयंसेवकहरू तथा स्थानीय सरोकारवाला निकायका प्रतिनिधिहरूको उपस्थिति उल्लेखनीय थियो। राहत पाएका स्थानीयहरूले नगरपालिकाको सक्रियता र संवेदनशीलताप्रति आभार व्यक्त गरे।

वडा नं. ९ का स्थानिय महेश मंडल ले आफ्नो पीडा सुनाउँदै भन्छन्,

“पूरै घर डुब्यो, केही बाँकी थिएन। नगरपालिकाको राहतले फेरि बाँच्ने हिम्मत मिल्यो।”

स्थानीय सरकारले राहत वितरणसँगै क्षतिग्रस्त क्षेत्रहरूको अभिलेखीकरण र पुनर्स्थापना योजना पनि अघि बढाएको छ। नगरपालिकाले आगामी दिनमा दीर्घकालीन दृष्टिकोणसहित विपद् व्यवस्थापन प्रणाली अझ प्रभावकारी बनाउने जनाएको छ।

यस घटनाले फेरि प्रमाणित गर्‍यो— विपत्तिको समयमा सरकार र समुदायबीचको सहकार्य नै सबैभन्दा ठूलो बल हो।
बर्दिवास नगरपालिकाको यो प्रयास स्थानीय सरकारको मानवीय दायित्व, संवेदनशीलता र जिम्मेवारीको सशक्त उदाहरणका रूपमा हेरिएको छ।