आज्ञा खबर
सिरहा
“सवारी ज्यान मुद्दा मिलाइदिन्छु“ भन्दै एक लाख ७० हजार रुपैयाँ ठगी गरेको आरोपमा सिरहाबाट एक व्यक्ति पक्राउ परेका छन्। ठगीको आरोपमा विष्णुपुर गाउँपालिका–१, गौरीपुरका ३८ वर्षीय प्रमोदकुमार महतोलाई पक्राउ गरिएको जिल्ला प्रहरी कार्यालय सिरहाले जानकारी दिएको छ।
जिल्ला प्रहरीका सूचना अधिकारी, प्रहरी नायब उपरीक्षक (डिएसपी) वीरेन्द्रकुमार पासवानका अनुसार सिरहा नगरपालिका–१६, माडरका विवेक यादव सवारी ज्यान मुद्दामा हिरासतमा रहँदा महतोले यादवका परिवारसँग मुद्दा मिलाइदिने भन्दै रकम लिएका थिए।
विवेक यादवकी आमा रानीदेवी यादवले २०८१ साल असार २७ गते महतोले आफूसँग एक लाख ७० हजार रुपैयाँ लिएको जाहेरी प्रहरीमा दिएकी थिइन्। प्रहरीका अनुसार महतोले आफू कानुनी प्रक्रिया मिलाउन सक्षमताको भ्रम दिएर रकम असुल गरेका थिए।
“मुद्दामा फसेका छोरालाई छुटाइदिन्छु भनेर उसले धेरै आश्वासन दियो,” पीडित पक्षले भनेका छन्, “हामीजस्ता कानुन नबुझ्नेले त्यस्तै मान्छेको विश्वास गर्नुपर्ने स्थिति हुन्छ।”
यसै क्रममा प्रहरीले जाहेरीको आधारमा महतोमाथि अनुसन्धान अघि बढाइएको छ। उनलाई नियन्त्रणमा लिएर जिल्ला अदालत सिरहाबाट चार दिनको म्याद लिइएको र थप अनुसन्धान भइरहेको प्रहरीले जनाएको छ।
प्रहरी नायब उपरीक्षक पासवानले यस किसिमको ठगी कार्यलाई सामाजिक अपराधको रूपमा लिँदै आम नागरिकलाई सावधानी अपनाउन आग्रह गरे। “कोही कसैले कानुनी काम गराइदिन्छु, मुद्दा मिलाइदिन्छु भन्दै पैसा मागेमा तुरुन्त प्रमाणसहित प्रहरीमा जानकारी दिनुहोस्,” पासवानले भने।
ग्रामीण क्षेत्रमा कानुनप्रति जनचेतनाको अभाव र डरको वातावरणका कारण यस्ता दलालहरूले सजिलै विश्वास जित्ने गरेका छन्। प्रहरीका अनुसार अदालत र प्रहरी प्रशासनको पहुँचभन्दा टाढा हुनेहरूले यस्ता ठगीको सिकार हुने सम्भावना बढी हुन्छ।
यस घटनाले प्रहरी प्रशासनले यस्ता गिरोहमाथि निगरानी बढाउनु पर्ने आवश्यकता देखाएको छ भने, आम नागरिकले पनि कानुनी प्रक्रियाबारे सचेत हुनुपर्ने देखिएको छ।
