आज्ञा खबर
सर्लाही
शुक्रबार साँझ आएको भीषण हुरीले सर्लाही जिल्लामा ठुलो क्षति पुर्याएको छ। हुरीका कारण विभिन्न स्थानमा छ जना घाइते भएका छन् भने कयौं घर, होटल र सवारीसाधनमा क्षति पुगेको छ।
जिल्ला प्रहरी कार्यालय सर्लाहीका अनुसार हुरीले विशेषगरी कच्ची घर र रूखहरूमा क्षति पुर्याएको हो। हुरीबाट सबैभन्दा बढी असर बागमती, हरिपुर्वा, हरिवन, गोडैता र ईश्वरपुर क्षेत्रमा परेको छ।
घाइतेहरूको विवरण यसप्रकार छ:
-
बकाइनोको रूख भाँचिँदा घाइते:
बागमती नगरपालिका–२ धरहराका ३८ वर्षीय नवराजराय क्षेत्रीको ढाडमा चोट लागेको छ। बारीमा काम गरिरहँदा रूख भाँचिएर लाग्दा उनी घाइते भएका हुन्। प्रारम्भिक उपचारपछि उनलाई भरतपुर पठाइएको छ। -
छतबाट खस्दा घाइते:
हरिपुर्वा नगरपालिका–६ की ५० वर्षीया सुमीदेवी हुरीका कारण छतबाट लडेर घाइते भएकी हुन्। हात, मुख र आँखामा चोट लागेको छ। उनी जनकपुरस्थित प्रादेशिक अस्पतालमा उपचाररत छन्। -
मोटरसाइकलमा रुखको हाँगा खस्दा:
हरिवन नगरपालिका–५ घुर्कौलीका बलिराम महतो (१८) र गङ्गाराम महतो (५२) सानो जगतपुरमा मोटरसाइकलमा यात्रा गरिरहेका बेला रुखको हाँगा खसेर घाइते भएका छन्। -
जस्तापाताको चोट:
हुरीले उडाएको जस्तापाता लाग्दा ७५ वर्षीया दलेमुन खातुन घाइते भएकी छन्। हरिवन नगरपालिका–५, घुर्कौलीस्थित आफ्नै घरको किराना पसलमा बसिरहँदा उनी घाइते भएकी हुन्। उनको दायाँ आँखामा चोट लागेको छ। -
सडक दुर्घटनामा चालक घाइते:
ईश्वरपुर नगरपालिका–१२ मा रुख ढलेर बाटो छेकेपछि पिकअप गाडी सडक छेउमा पल्टिएको छ। दुर्घटनामा पर्सा गाउँपालिका–४ का ३५ वर्षीय चालक राजनारायण महतोको हातको औँला घाइते भएको छ।
सम्पत्ति क्षति:
-
होटलमा क्षति:
गोडैता नगरपालिका–१२ मधुवनी गाउँमा सञ्चालित एक होटलमा हुरीका कारण करिब ६० हजार रुपैयाँ बराबरको क्षति भएको छ। -
प्रहरी कार्यालयको पार्किङमा क्षति:
हरिवन नगरपालिका–११ मा रहेको इलाका प्रहरी कार्यालयको परिसरमा रूख ढल्दा तीनवटा मोटरसाइकल क्षतिग्रस्त भएका छन्। तीमध्ये एक प्रहरी कार्यालयकै मोटरसाइकल हो भने दुईवटा अनुसन्धान प्रयोजनका लागि राखिएका थिए।
प्रहरी नायब उपरीक्षक सरोज राईका अनुसार अझै पनि विभिन्न स्थानमा क्षतिको विवरण संकलन कार्य जारी रहेको छ। लगातारको मौसम परिवर्तनसँगै नागरिकलाई सतर्क रहन समेत प्रहरीले आग्रह गरेको छ।
