मिनबहादुर शेन
बर्दिवास अस्पताल सि :अंहेब :अधिकृत
गर्मी मौसम सुरु भएसँगै शरीरको उचित हेरचाह गर्न आवश्यक हुन्छ। अत्यधिक तापक्रम, घाम, पसिना र पानीको कमीका कारण शरीरमा विविध समस्या देखिन सक्छन्। यसै क्रममा महोत्तरीको बर्दिवास स्थित सरकारी अस्पताल बर्दिवास अस्पतालका स्वास्थ्य शिक्षा अधिकृत मिन बहादुर सेनका अनुसार गर्मीमा सामान्य भन्दा बढी सचेत हुन आवश्यक छ, ताकि स्वास्थ्यमा नकारात्मक असर नपरोस्।
पर्याप्त पानी पिउनुहोस्
गर्मीमा शरीरबाट अत्यधिक पसिना निस्कने भएकाले डिहाइड्रेसनको खतरा बढ्छ। यसलाई रोक्न दिनभरमा प्रशस्त पानी पिउनु पर्दछ। साथै, नरिवल पानी, जुस, लस्सी जस्ता तरल पदार्थहरू पनि उपयोगी हुन्छन्।
हल्का र आरामदायक लुगा लगाउनुहोस्
गर्मी मौसममा हल्का, कपासको लुगा लगाउनु उपयुक्त मानिन्छ। यसले छालालाई सास फेर्न सहयोग पुर्याउँछ र पसिना सुक्न सजिलो बनाउँछ।
घामबाट जोगिनुहोस्
बाहिर निस्कँदा टोपी, गागल्स र सनस्क्रिन प्रयोग गर्नु अत्यन्तै महत्वपूर्ण हुन्छ। दिउँसो ११ बजेदेखि ३ बजेसम्मको समय अत्यधिक गर्मी हुने भएकाले सकेसम्म त्यो समयमा अति आवश्यक काम बाहेक घरबाट बाहिर जान हुँदैन।
स्वस्थ आहारको सेवन गर्नुहोस्
गर्मीमा पचाउन सजिलो, ताजा फलफूल र हरियो सागपात खानु उपयुक्त हुन्छ। तारेका, मसलेदार र गह्रौँ खाना जति सक्दो कम गर्नुपर्छ।
सार्वजनिक चेतना आवश्यक
गर्मीका कारण वृद्धवृद्धा, साना बालबालिका, गर्भवती महिला तथा दीर्घरोगीहरूमा जोखिम बढी हुने भएकाले परिवार र समुदायले विशेष ध्यान दिनुपर्छ।
गर्मी मौसमलाई सजिलै पार लगाउन यी साना तर महत्वपूर्ण उपायहरू पालना गर्न सकेमा शरीरलाई ताजा र स्वस्थ राख्न सकिन्छ। शरीरलाई मौसम अनुसारको हेरचाह नै दीर्घकालीन स्वास्थ्यको आधार हो।
