आज्ञा खबर
बर्दिवास
महोत्तरी प्रहरीले जिल्लाको मटिहानी नगरपालिकाबाट स्रोत नखुलेको ६ लाख रुपियाँसहित एक जनालाई पक्राउ गरेको छ । पक्राउ पर्नेमा जनकपुर उपमहानगरपालिका वडा नं. १ बस्ने २५ वर्षीय अनिस राईन रहेका छन् । मटिहानी नगरपालिका वडा नं. ६ स्थित जिल्ला प्रहरी कार्यालय महोत्तरी र मटिहानी प्रहरी चौकीको संयुक्त टोलीले शनिबार चेकजाँच गरिरहेको समयमा भारतबाट नेपालतर्फ आउदै गरेका राईनलाई स्रोत खुलाउन नसकेको रकमसहित पक्राउ गरेको हो ।
भारतबाट मटिहानी तर्फ प्र.२–०२–००४ प ७१६७ नं. को मोटरसाइकलमा आएका उनलाई प्रहरीले चेकजाँच गर्दा छ लाख ६८ हजार पाँच सय रुपियाँ बरामद गरेको जिल्ला प्रहरी कार्यालय महोत्तरीका प्रवक्ता सन्तुलालप्रसाद जैसवारले जानकारी दिए ।
राईनको साथबाट एक हजारको दरले ५ सय २९ थान र पाँच सयको दरले २ सय ७९ थान नगद रुपैयाँ बरामद गरिएको प्रहरीले जनाएको छ ।
