आज्ञा खबर
सप्तरी
सप्तरीमा भीषण आगलागी हुँदा दुई सय घर जलेर नष्ट भएको छ। जिल्लाको महादेवा गाउँपालिकामा मंगलवार भीषण आगलागी हुँदा करिब दुई सय घर जलेर नष्ट भएको हो। स्थानीय शत्रुधन यादवको घरबाट सल्किएको आगोले गाउँ नै जलेको हो। यादव, मुसहर र मुस्लिम समुदायको बसोबास रहेको यो बस्तीका अनुमानित दुई सय घर जलेर नष्ट भएको प्रहरीले जनाएको छ ।

गाउँपालिकाको वडा नम्बर १ चिम्टी टोलमा तीव्र गतिमा हावा चलेको बेला सल्किएको आगोले ठूलो क्षति भएको प्रहरीले जनाएको छ। आगलागीमा करिब ६०÷७० लाख भन्दा बढी मूल्य बराबरको क्षति भईसकेको जिल्ला प्रहरी कार्यालय सप्तरीले जनाएको छ।

आगो निभाउन राजविराज, शम्भुनाथ, हनुमाननगर कङ्कालिनी नगरपालिकाबाट आएको बारुण यन्त्रका साथै नेपाल प्रहरी र स्थानीयले प्रयास गरिरहेका छन्। आगलागीको थप विवरण आउन बाँकी रहेको बताईएको छ ।