आज्ञा खबर
धनुषा
लोकतान्त्रिक समाजवादी पार्टी (लोसपा)का मधेस प्रदेशसभा सदस्य तथा संसदीय दलका नेता अभिराम शर्मालाई महोत्तरी जिल्ला अदालतले जन्मकैदको फैसला सुनाइएपछि प्रदेशसभा सदस्यका रुपमा पाउने उनको सेवासुविधा रोक्का गरिएको छ ।
मधेश प्रदेशसभा सचिवालयका अनुसार मधेश प्रदेशसभामा पदाधिकारी तथा सदस्यहरुले १३ प्रकारका सेवासुविधा पाउँदै आइरहेका छन् । तर अदालतबाट जन्मकैदको फैसला भइसकेपछि माघ महिनादेखि शर्माको हकमा सबै प्रकारका सेवासुविधा रोक्ने आदेश दिइएको प्रदेश सभामुखको कार्यालयले जनाएको छ ।
महोत्तरी जिल्ला अदालतले कर्तव्य ज्यानसम्बन्धी मुद्दामा शर्मासहित ७ जनालाई जन्मकैदको फैसला सुनाएको छ । ०७२ भदौ २८ मा दोस्रो मधेस आन्दोलनका बेला सशस्त्र प्रहरीका असई थमन विकको हत्याको अभियोगमा गत मंसिर २८ गते अदालतले शर्मासहित ७ जनालाई जन्मकैदको फैसला सुनाएको हो ।