आज्ञा खबर
सिरहा
सिरहाको सुखिपुरमा पीकप भ्यान अनियन्त्रितभई घरमा ठोकिँदा घुर तापिरहेका एक जनाको मृत्यु भएको छ। दुर्घटनामा ५ जना घाइते भएका छन्। घाइते मध्येय दुईजनाको अवस्था गम्भिर रहेको छ।
जिल्लाको सुखिपुर नगरपालिका १ शिवनगरका जितन मोची र भोरिल रामको घरमा प्र. २–०१–००१ च ०६३१ नम्वरको पिकप भ्यान अनियन्त्रित ठोकिंदा ७२ वर्षिय जितन मोचिको मृत्यु भएको प्रहरीले जानकारी दिएको छ। दुर्घटनाम परी गम्भिर घाईते मोचीलाई उपचारको लागि अस्पताल पुर्याउँदै चिकित्सकले मृत घोषणा गरेका थिए। शव रामकुमार उमाप्रसाद प्रादेशिक अस्पताल लहानमा राखिएको छ।
घटनामा ७० वर्षिय गुजरी राम र चालक १८ वर्षिय शंकर यादव गम्भिर घाईते भएका छन्। उनीहरुको स्थानीय स्वस्थ्य संस्थामा प्राथमिक उपचार पछि थप उपचारको लागि विराटनगर लगिएको जिल्ला प्रहरी कार्यालय सिरहाका सूचना अधिकारी रबिन्द्र राज पाण्डेले जानकारी दिए।
अन्य तीन जनाको लहान र धनगढीका स्वास्थ्यसंस्थाहरुमा उपचार भईरहेको छ। प्रहरीले राती नै गाडी र चालकलाई नियन्त्रणमा लिएको जनाएको छ।
पीकपको ठक्करबाट माटोका दुवैघरमा क्षेती पुगेको प्रहरीले जनाएको छ।
अहिले प्रहरीले स्थानीय जनप्रतिनिधीको रोहबरमा घटना प्रकृति मुचुल्का उठाउने काम गरिरहेको वडाअध्यक्ष राजेन्द्र प्रसाद चौधरीले जानकारी दिए।
प्रहरीले घटनाको विषयमा थप अनुसनधान गरिरहेको जनाएको छ।
