आज्ञा खबर
सर्लाही
सर्लाहीको बरथवा नगरपालिका–५ मा प्रहरीको गोली लागेर एक युवकको ज्यान गएको घटनामा गोली चलाउने प्रहरी अधिकारी बर्खास्तीमा पर्ने भएका छन् ।
छानबिनमा क्रममा अनावश्यक बल प्रयोग गरेको पाइएपछि इलाका प्रहरी कार्यालय, बरथवाका वरिष्ठ हवल्दार सोनेलाल यादवलाई बर्खास्त गर्ने तयारी प्रहरी प्रधान कार्यालयले गरेको हो ।
घटनाबारे छानबिन गर्न गृह मन्त्रालयले बनाएको सह–सचिव थानेश्वर गौतम नेतृत्वको समितिले पनि उनलाई बर्खास्त गर्न सिफारिस गरेको थियो । २० पुसमा अस्पताल स्थापनाको विषयमा विवाद हुँदा बरथवा नगरपालिका–६ का जयशंकर साह मारिएका थिए ।
प्रहरी प्रधान कार्यालय, नक्सालका एक उच्च अधिकृतका अनुसार, घटनालगत्तै हवल्दार यादवलाई निलम्बन गरेर छानबिन गर्न भनिएको थियो । यद्यपि, उनलाई जिल्ला प्रहरी कार्यालयमा तानेर राखिएको थियो ।
भिड नियन्त्रणमा खट्ने प्रहरीको मनोबल गिर्ने भन्दै कारबाही गर्न प्रहरी हच्किएको थियो । तर, सहसचिव गौतम नेतृत्वको टोलीले गरेको स्थलगत अध्ययनका क्रममा समेत अनावश्यक रुपमा वरिष्ठ हवल्दार यादवले बल प्रयोग गरेको भेटिएपछि बर्खास्तीका लागि सिफारिस गरिएको हो ।
छानबिन समितिका एक सदस्यका अनुसार, जुन ठाउँमा गोली लागेर साहको मृत्यु भएको छ, त्यहाँ गोली चलाउनुपर्ने स्थिति नै देखिएको छैन । अझ साह इलाका प्रहरी कार्यालय वरथवामा हवल्दार मेजरको रुपमा कार्यरत थिए, जसको जिम्मेवारी हवल्दार र जवानहरुलाई अह्रनखटन गर्नु हुन्थ्यो ।
तर, घटना भएका दिन इलाका प्रहरी कार्यालय, बरथवामा रहेका साह कार्यालयबाहिर गेटमा सुरक्षार्थ खटिएका सेन्ट्रीको एसएलआर (सेल्फ लोडेड राइफल) लिएर बाटोमा निस्किएको पाइएको छानबिन समितिका एक सदस्य बताउँछन् ।
हवल्दार साहले भने आफ्नो हतियार खोस्न खोजेपछि गोली चलाउनुपरेको स्पष्टीकरण दिएका थिए । तर, छानबिन समितिले संकलन गरेको त्यसदिनको भिडियो फुटेजहरुमा त्यस्तो परिस्थिति नदेखिएको छानबिनमा संलग्न अधिकृतहरु बताउँछन् ।
समिति स्रोतका अनुसार, त्यसक्रममा धेरै मान्छे नभएको स्थानमा साहलाई गोली लागेको देखिएको छ । हवल्दार साहले चलाएको गोली उनको टाउकोमा लागेको मेडिकल जाँचबाट देखिएको छ ।
जिल्ला प्रहरी कार्यालय, सर्लाहीका प्रमुख एसपी प्रविण धितालले मृतक साहलाई एउटा गोली लागेको देखिएको बताएका छन् ।
वडा नम्बर ६ का वडाध्यक्ष मोहम्मद अफताब आलमले बताएअनुसार, जयशंकर प्रदर्शनमा सहभागी समेत थिएनन् । महसुल तिर्न मोटरसाइकल चढेर विद्युत कार्यालय नजिकै पुगेका थिए, त्यही बेला प्रहरीले चलाएको गोली लागेर उनी सडकमै ढलेका थिए ।
सर्लाही प्रहरी प्रमुख एसपी धितालले छानबिन समितिको प्रतिवेदनका आधारमा प्रहरी प्रधान कार्यालय, नक्सालबाट आउने पत्रअनुसार यसमा संलग्नमाथि कारबाही हुने बताए ।
‘अहिलेसम्म पत्र आइसकेको छैन, पत्र आएपछि त्यही अनुसार कार्यान्वयन गर्छौं’, उनले भने । सर्लाहीका प्रमुख जिल्ला अधिकारी कोमलप्रसाद धमलाले त्यसबारे घटनामा गोली चलाउन आदेश नदिएको दाबी गरेका थिए ।
साभार अनलाइन खबर
