आज्ञा सम्वाददाता
पर्सा
बन्दुक बोकी बीरगंजको बडेर्वाबाट तेलिया टोलतर्फ जाँदै गरेका एकजनालाई पर्सा प्रहरीको टोलीले १२ बोरको एक नाले घरेलु बन्दुकसहित पक्राउ गरेको छ । पक्राउ पर्नेमा पर्सागढी नगरपालिका– ९ बस्ने वर्ष २७ का मनोज भन्ने शिवु माझी मुसहर रहेका छन।
प्रहरीले विशेष सूचनाका आधारमा खोजतलास तथा अनुसन्धानको क्रममा इलाका प्रहरी कार्यालय एकटाँगा र अस्थायी प्रहरी पोष्ट मनवाबाट संयुक्त टोलीले तेलिया टोल जाने सडकखण्डबाट मुसहरलाई पक्राउ गरिएको प्रहरी उपरीक्षक रमेशकुमार बस्नेतले जानकारी दिए ।
मुसहर प्रहरी टोलीलाई देख्नासाथ भाग्ने खोजेका थिए । तर प्रहरीले सक्रियता देखाउँदै १२ बोरको १ नाले घरेलु बन्दुकसहित मुसहरलाई पक्राउ गर्न सफल भएको जनाएको छ।
पक्राउ परेको मुसहरलाई हातहतियार तथा खरखजानासम्बन्धी कसूरमा अनुसन्धान भइरहेको जिल्ला प्रहरी कार्यालय पर्साका प्रहरी नायब उपरीक्षक ओमप्रकाश खनालले जानकारी दिए ।
