धनुषामा गाडीको ठक्करबाट प्रहरी वरिष्ठ हवल्दारको ज्यान गएको, गाडी फरार
जनकपुरधाम- धनुषामा गाडीको ठक्करबाट एक प्रहरीका वरिष्ठ हवल्दारको मृत्यु भएको छ ।
गाडीको ठक्करबाट गए राती ईलाका प्रहरी कार्यालय ढल्केवरमा कार्यरत प्रहरी वरिष्ठ हवल्दार भोजराज पराजुलीको मृत्यु भएको हो ।
पूर्वपश्चिम राजमार्ग अन्तर्गत धनुषाको ढल्केवरचोकमा ड्युटी सकाएर कार्यालय तर्फ पैदल जाँदै गर्दा वरिष्ठ हवल्दार पराजुलीलाई ईलाका प्रहरी कार्यालय कै अगाडी नम्बर नखुलेको गाडीले ठक्कर दिएको थियो।
उनको घटनास्थल मै मृत्यु भएको ईलाका प्रहरी कार्यालय ढल्केवरका प्रहरी निरीक्षक रामसागर सिंहले जानकारी दिए। ठक्कर दिने गाडीको खोजी भइरहेको प्रहरी निरीक्षक सिंहले जनाए।
सिसी क्यामेरामा ठूलो गाडी ट्रक वा मालबाहक ट्यांकरले ठक्कर दिएको हुन सक्ने प्रहरीको अनुमान छ ।
ओखलढुंगाको चिंशखुगढी गाउँपालिका–५ स्थायी घर भएका वरिष्ठ हवल्दार पराजुली तीन महिना अघि ईलाका प्रहरी कार्यालय ढल्केवरमा सरुवा भएर आएका थिए।
मृतकको शव पोस्मार्टमका लागि जनकपुरधाम स्थित प्रादेशिक अस्पतालमा राखिएको ईलाका प्रहरी कार्यालय ढल्केवरले जनाएको छ।
साभार: शिरिष न्यूज
