- आज्ञा खबर
बर्दिवास
आज (साउन २७ गते) विश्वभर अन्तर्राष्ट्रिय युवा दिवस विभिन्न कार्यक्रमका साथ मनाइँदैछ। संयुक्त राष्ट्रसंघले सन् १९९९ मा स्थापना गरेको यो दिवस हरेक वर्ष अगस्ट १२ तारिखका दिन युवा अधिकार, अवसर र भूमिकाको महत्त्वलाई उजागर गर्न मनाइन्छ।
यस वर्षको नारा “युवाहरूको सहभागिताः दिगो भविष्यको आधार” रहेको छ। यस सन्देशमार्फत युवा पुस्तालाई सामाजिक, आर्थिक र राजनीतिक निर्णय प्रक्रियामा सक्रिय रुपमा सहभागी गराउन आह्वान गरिएको छ।
नेपालभरका सरकारी, गैरसरकारी तथा युवासम्बन्धी संस्थाहरूले आज विविध कार्यक्रम आयोजना गर्दैछन्। विद्यालय, कलेज, सामुदायिक भवन र सार्वजनिक स्थलहरूमा बहस, गोष्ठी, र्याली तथा सांस्कृतिक कार्यक्रमहरू सञ्चालन भइरहेका छन्। यसैक्रममा बर्दिवासमा रहेको समाजिक संस्था युवा सञ्जाल बर्दिवासले नगरपालिकाको बिकासमा युवा सहभागिता भन्ने शिर्शकमा अन्तरक्रियगर्ने कार्यक्रम रहेको सो संस्थाका अध्यक्ष सुरीन्दर शाहले जानकारी दिए ।
विशेषज्ञहरूका अनुसार युवाहरूको क्षमता र सिर्जनशीलतालाई विकास योजनामा समेट्न सकेमा दिगो र समावेशी विकास सम्भव हुन्छ। स्थानीय तहका जनप्रतिनिधिहरूले युवालाई नीति निर्माणदेखि कार्यान्वयनसम्मको प्रक्रियामा सहभागी गराउन प्रतिबद्धता व्यक्त गरेका छन्।
संयुक्त राष्ट्रसंघका तथ्यांकअनुसार विश्व जनसंख्याको करिब १६ प्रतिशत हिस्सा १५ देखि २४ वर्ष उमेर समूहका युवाहरू छन्। नेपालमा यो अनुपात अझै उच्च छ, जसले युवाहरूलाई मुलुकको सामाजिक रूपान्तरण र आर्थिक प्रगतिमा निर्णायक शक्ति बनाउँछ।